楊天宇練到爆皮見血又暈全靠張繼聰救命 地獄特訓1個月爆肌拍《𥚃應外合》丨獨家

29歲楊天宇（Angus）、周家怡和馬思惠（Macy）@VIVA合演動作新片《𥚃應外合》，Angus和Macy首拍動作片，開拍前已練到周身傷，前者手掌起晒繭，仲要爆晒皮見血，越拍越瘦好彩有張繼聰救佢一命，而後者更入埋醫院做手術。而家怡就唔使打，仲可以狂摸Angus的超強胸肌。採訪：杜杜 攝影：朱偉彥 髮型:Cliff Chan@MYÖS(天宇)、Myos Jeremy（Macy） 化妝:Owen Ko @owenko.station(天宇) 、Davina Cheung@Cyrus Lee Makeup Team（Macy）服裝:@evisu_hk(天宇)造型: @ithk@EMODA（Macy）

Angus、家怡和Macy認為拍打戲雖辛苦，但有好效果都值得。

Angus、家怡和Macy認為拍打戲雖辛苦，但有好效果都值得。

Angus拍完戲後迷上街頭健身2年，直到年前不想手掌再受傷才停玩。

家怡轉述導演袁劍偉說話，「佢話我好打得，只係冇拍出嚟。」

從不健身的Macy，拍完戲後認為對體力好有幫助而keep住做。

 繼去年電影《電子靈》後，Angus再擔正《𥚃應外合》男一，戲中要瘋狂騷肌兼由頭打到尾，但只得1個多月時間準備，唯有學運動員一樣密集式操練，「星期一、三、五練電影動作，晏晝就練西洋拳同舉鐵，星期二、四、六就健身，夜晚再練西洋拳同舉鐵，一星期練足6日。」為了極速減磅，他更要着住類似太空衣的緊身衣，「係透唔到氣嗰種衫，着住嚟做運動、打西洋拳，一除衫啲汗跌晒落地好誇張。」

Angus為電影苦練街頭健身，狂操單槓高搞到傷晒。

Macy有跟Angus一齊鍛鍊，亦有受傷。

手掌爆缸照練單槓

只是操練，Angus已練到爆晒缸，但一班魔鬼教練冇打算放過他，「我操到暈咁滯，個教練見我暈暈哋，就問我有冇食早餐，我話因為遲咗，只食咗隻蛋，點知佢話唔緊要飲啖水再嚟過，仲有練街頭健身，玩單槓搞到手掌爆晒，見晒肉流緊血，我諗住受傷終於可以唞唞，但教練照樣叫我上槓，我問『爆咗都上槓？』，佢話『你爆咗無名指之嘛，突起隻無名指揸槓咪得囉』，我係咁樣模式去訓練。」

Angus練單槓搞到手掌成塊肉飛走，爆晒缸都照練。

Angus練單槓搞到手掌成塊肉飛走，爆晒缸都照練。

由於冇經驗，Angus冇時間做運動仲keep住節食，搞到拍落水戲時凍到震，「啱啱入秋啲水好冰，我頂唔順係咁震，髮型師幫我全身吹熱風，有工作人員直情求我『𠵱家放宵夜你食少少嘢啦』，最終我係啪咗成個牛腩河仲加辣椒醬，個人即刻脹返，咁橋我之後就係拍第1場除衫打交戲。」

Angus認為拍打戲，受這種傷好少事。

Macy軟組織撕裂入院

電影拍到尾聲，Angus身形越拍越縮水，全靠張繼聰「救一命」，「同佢拍最尾嗰場對打戲，佢同我講『你個人凹晒』，我話我冇時間做gym，佢話『你一定要食返啲澱粉質』，我話教練叫我唔可以食澱粉質，唔係會冇咗個線條，但係佢有經驗，當時教練又唔在現場，佢攞咗包朱古力果仁畀我食，好感動，又真係冇肥到，佢冇點我，哈哈！」家怡笑指：「唔怪之得佢成日揸住袋杏仁，好似松鼠仔咁。」

為這副靚身材，Angus下了不少苦功。

Angus跟張繼聰於戲中對立，戲外非常感激前輩提點。

拍動作戲難免受傷，Angus亦唔例外，就算加晒護墊一樣中招，「喺獸醫診所俾人任打嗰場最甘，講我俾幾個人搵書架擲，我墊晒護墊喺背脊，但偏偏擲正最尾冇墊嗰個位，好痛仲瘀晒，好彩冇事。」大學修讀舞蹈系的Macy，柔軟度有助演繹打戲，但一樣受傷收場，「訓練時要同武師背對背翻過去，喺佢身上做大字馬，可能動作有少少唔啱，就大字馬咁撻咗落嚟，整傷咗寬關節，即係大髀罅，痛到唔敢俾人扶起，要慢慢起返身，但我仲堅持繼續訓練。」拍完戲後她再練舞，又需要做大字馬，做完痛足3日先識驚，「我去醫院check，發現有個軟組織撕裂咗，要做手術修補，𠵱家復元返。」

Macy有舞蹈根底，提腿等動作完全難不到她。

Angus誤傷Macy下巴，「中咗一拳，把口有5分鐘合唔埋。」

想拍超現實英雄片

戲中家怡跟Angus唯一對手戲，就是用心臟電擊器為他急救，更要在男方強勁胸肌上狂搽啫喱，但訪問當日，家怡竟然冇晒印象，「Angus啱啱話畀我聽，我有份幫佢搽，我真係唔記得咗呀！咁緊要嘅事，點解我會唔記得㗎？！」搞到Angus投訴，「我真係有啲傷心囉！」講到這場戲會令好多女觀眾羡慕，家怡答得搞笑：「證明我係好好嘅演員，當刻淨係諗要救返佢，完全有諗過要搏懵，哈哈！」今次拍動作戲未夠喉，3人都希望下次有機會再拍，家怡更想挑戰超級英雄片，「嗰啲英雄片都係超現實，可以做啲現實做唔到嘅嘢都幾正。」

就是救Angus這場戲，家怡有機會摸對方胸肌。