旅遊達人項明生墮投資陷阱失160萬 55歲初老分享唯一成功投資法｜Juicy叮

旅遊達人項明生早前55歲生日，踏入初老年齡，43歲已提前退休的他，曾涉獵各種投資工具，他在生日時，盤點過往投資戰績，坦言失敗居多，亦曾墮投資陷阱，損失最少160萬。

失敗中學習！項明生屢墮投資陷阱 最後發現「咁樣」投資最成功：↓↓↓↓

來自草根階層的項明生，曾任職於日本企業Sony多年，為Sony首位華人董事。

他趁其55歲生日，最近在其個人Youtube頻道，盤點過往投資實戰經驗，總結他個人對養老投資和如何達到財務自由的看法。

他表示，他在1985年15歲時由內地來港，「我袋裏得兩蚊，過咗廿八年時間嘅努力同奮鬥，我到咗2013年，已經可以達到財務自由，可以提前退休環遊世界。」

他強調，自己並非是專業的財務規劃師，分享的只是個人在過去30多年的成功和失敗規劃，「希望對大家有啲啟發啦！」

要提前退休先調整心態

他表示，如想提前退休，第一要調整自己心態，降低自己物質享受程度，「即系譬如你需要買好多手袋啊，買好多車啊，或者係住大屋啊，咁嗰啲你可能真係要辛苦少少。」

他透露，在30多歲時，已開始規劃想提前退休，「咁我就調整咗自己心態，我計一計，我其實唔需要咁多嘢啊，即係我簡簡單單嘅生活，我又唔需要工人，我又唔需要大屋，我唔需要名車，咁樣計一計，其實我需要可能真係兩、三百萬，已經夠我退休。」

他指，一名大學生只要勤力工作，「做十幾二十年嘢搵兩三百萬，其實就唔係夢想嚟嘅。」

「男怕入錯行，女怕嫁錯郎」

除了調整自己心態外，項明生指出，第二樣是要開始規劃自己人生，「男怕入錯行，女怕嫁錯郎，你搵到個啱嘅職業，畀心機做嘢，然之後慳啲使，開始積極咁樣措錢，其實已經係一個好好嘅人生規劃。」

他說，自己1992年畢業，直至2013年退休，這21年時間，他「一方面搵錢，一方面慳錢，兩樣都唔少得」。

他提及自己在Sony期間，非常勤力工作，「我朝頭早9點鐘做到夜晚11點，日日瞓得個五個、六個鐘頭，我長時間係睡眠不足。」

「我係極度慳儉！」

「我三十幾歲已經做咗（Sony）董事，我個月薪已經係......我唔方便講幾多啦，不過係相當高嘅一個月薪，但係我同齡嘅後生仔入便，我使嘅錢係好少嘅，我係極度慳儉！」

「係當時我係帶飯返公司，我係唔出街食飯嘅，呢樣嘢令我慳咗好多錢，我亦都冇自己畀錢去食晚飯，通常都係應酬先至出去食晚飯，我自己就唔會使幾千蚊食一個晚餐，幾百蚊都唔會。」

慳出第一桶金

「我長期帶飯盒，直至到做董事，我都係帶飯盒返公司食，咁樣，我（每日）午餐最少可以慳50蚊，晚餐就慳到100蚊。」

他表示，就是一方面努力搵錢，而另一方面努力慳錢，他「慳到第一桶嘅金出嚟」。

「我廿幾歲就開始投資啦」

當有第一桶金後，他開始進行財務規劃，他坦言自己不是「一個好叻嘅財務規劃嘅人，因為我自己唔係讀財務」，但過往近30年「多數失敗嘅真實(投資)案例」，這些經驗應該對讀者有所啟發。

他說：「我廿幾歲就開始投資啦，不過就失敗嘅例子居多。」幾乎所有投資工具都有涉獵。

「好多人吼住你份糧！」

他首先提醒讀者小心投資中介，「即係小心呢啲氹啦，有好多人都係吼住你嗰份糧，或者你嘅saving（積蓄），諗住喺入便搵錢嘅。」

他最早買的投資工具，是101儲蓄保險，「基本上可以話係騙局啊。」因為他的一名大學同學做了保險經紀，遊說他購買。另一份是銀行職員遊說他購買。

買101儲蓄保險中伏

於是，當時廿五、六歲的項明生，一共買了兩份101儲蓄保險，「一供就供咗廿幾年，（最後）一份就蝕到『攤攤腰』，因為佢係基金嚟嘅，基金嘅101；另外一份都叫做賺咗『啲啲』，不過個回報都好低，係囉呢個係一個失敗嘅投資，奉勸大家投資就唔好假手收於人。」

項明生表示，除了101保險，他其後開始買股票，「我學人炒股票，周圍聽下啲消息啊，聽下啲number，上網睇下啲嘢啦，其實好似賭博咁樣，有賺有蝕。」

買股票虧蝕 最蠢假手於人

「長期拉勻嚟講，其實都係蝕嘅，因為我後尾好開始忙，冇時間去打理，後尾最蠢就係假手於人。」

他有一名朋友的女友任職證券行，主動接觸他，「佢話佢可以幫我炒......佢就係咁賺佣金，係咁出入好頻密，炒得最尾都係蝕，到咗一年之後我就斬纜喇，我蝕咗幾十萬。」

他總結經驗：「永遠都唔好假手於人，千祈唔好信話可以幫你賺錢嘅人，你最好自己睇清楚。」

買債券蝕160萬

除了股票，項明生還有買基金，「我買咗好多隻基金啊，嗰啲管理費，就永遠就佢賺，我就蝕嘅，我依家基金都唔買啦。」

基金以外，項明生還有買債券，「我另外一個Auntie同我講買債券啊，有一隻債券，有成7厘息㗎，仲係一間好大嘅公司......嗰陣時銀行得3厘啊。」

「然後又有另外一個銀行職員同我講，喂你咁鍾意債券，點解你唔買恆大啊」，於是項明生買入兩張恆大債券。

「20萬美金一張，買咗兩張，兩張最尾依家值幾多？依家兩張計埋都2,000蚊定3,000蚊，一次過就一張蝕咗160萬！」

「投資好多陷阱啊！」

項明生強調，他分享這些投資生敗經驗，希望讀者能提高警惕，「投資要好小心！因為好多陷阱啊！」

他表示，雖然自己眾多投資都蝕本收場，但目前仍能維持財務自由，繼續提前退休，不用返工賺錢，主要由於「人生唯一成功嘅一個投資」。

婆婆教成功投資方法

他形容那是「最老土嘅投資方法」，那就是「買磚頭」（即買樓），「雖然係上一代嘅傳統智慧，依家諗翻轉頭都係最明智嘅決定」。

他表示，此投資智慧是他婆婆教他，「佢同我講，有朝一日你有錢......一係就買地買屋，一係就買黃金。」

「好彩我有聽老人家話，我係一個好孝順嘅孫仔......我其實(買的)第一層樓，係為咗婆婆買嘅。」現在該層樓已升值超過10倍。

「所以你過去嗰20年，如果你係有投資無論係香港嘅物業，或者係大陸嘅物業......20年你賺到應該係6-7倍，如果係大陸嘅物業更加誇張。」

「我嘅孝心，最尾係得到好好嘅一pay off（回報），我買畀我婆婆住嗰啲屋，全部都賺咗好多錢，我婆婆走咗（過世）之後，我都冇賣到。」

同場加映：港男銀行做定存 經理一提議險令事主蝕凸 「把人當豬宰啊？」↓↓↓↓

定存「魔鬼陷阱」明賺實蝕？銀行經理咁提議 「把人當豬宰？」：

有網民上月（2月）初到本港一間銀行，做港元定期，險墮「魔鬼陷阱」。

他在小紅書發表逾200字控訴長Po，題為：「香港銀行能不能不要把客戶當傻子」。

他批評，該銀行女客戶經理的定存提議，涉嫌「把人當豬宰」。

當日，事主要做港元定存。

女客戶經理告訴他，港元定存年利率3.9%。

事主知悉利率後，猶豫不決。

這時，女客戶經理，提出一個「更加划算」的定存方案。

她說，可幫事主將港元換成美金，改做美元定存。

女客戶經理指，該銀行當日，美金利率為4.2%。

美元定存4.2%，比港元定存3.9%，高0.3%，似更加划算，為何事主感覺被騙？

事主初時亦認為划算，他當時「一想好啊」。

但他未即時答應，要求更多資料考慮。

他要求女客戶經理「報一個BID和ASK吧」，即港元兌美元的買入價（Bid）及賣出價（Ask）。

然後，客戶經理報價：7.76（買入價）／7.86（賣出價）。

事主聽到這個匯率，馬上意識到中伏，為什麼？

他說，一般市民，對換匯價差沒概念的人，「八成信了她，還以為賺到了。」

他指，若按銀行經理提議，港元兌美元做定存，以當日匯率，即時蝕匯率差價。

他以外匯公平價為中間價計算，當時，執行美金兌換時，「先虧上0.5%」。

「那美金定存多的0.3%，還有啥意義？」

換言之，事主認為，還未做定存，已先虧蝕0.2%。

早前，已有網民遇相同情況，指在港做美元定存，蝕匯率差價。

「換回港幣居然虧了11元，感覺自己白忙活了！」

今次事件中，事主說：「我不需要換美金，我只需要存一個最實惠的方案，

而不是聽人騙我損失0.5%的點......把人當豬宰啊？」

事主批評該經理涉嫌欺騙：「明明是打工人，幹嘛那麼愛為銀行說話」。

事主最後沒有用該經理推薦的方案，「當然，可能她不是騙我，只是單純不專業。」

網民熱議事件，反應兩極。

部分人批評該銀行經理「錯了，就是故意的，把客戶當傻瓜」，「她們就是這套路！」

不過，部分網民則力撐該經理，指她沒有欺騙誤導，「別人規則就那樣，你情我願。」

有網民提醒銀行始終是商業機構，「銀行不是慈善，你覺得差可以不換不用，明碼實價，有啥好抱怨？」

有網民又指涉事銀行「利息其實在同行中算比較高的」。

有人指事主批評本港銀行將客戶當傻子太偏頗，「客戶經理一定是奔着賺你錢目的去的。」「香港銀行沒有當你是傻子，是她當你是傻子。」