專欄│占士以身作則責無旁貸

列斯占士上周聯賽1:2敗予利物浦一役終於復出，但被領隊馬列斯卡要求盡快展示領導力，外人睇落好似有啲太苛刻，不過我認為作為隊長嘅占士，要盡快回復狀態並以身作則。

占士喺上季嘅下半季一直處於養傷狀態，季尾先復出兩場，不過8月熱身賽後又傷過，搞到要喺上個禮拜先正式復出。作為車路士球迷，近年占士因傷缺陣已經習慣晒。而頂替佢踢右閘嘅馬路古斯圖不知不覺變得成熟，所以占士嘅復出有時反而會令部分球迷缺乏信心，驚佢一傷再傷又要長唞。

不過，一位健康占士具備防守效率加身體條件，同埋佢既可勝任內切翼衛又可在邊路疊瓦助攻，有級數又有不同可塑性，現今球壇實在稀有。而且作為陣中極少數嘅自家青訓，一路睇住佢從邊路胡亂傳中成長到攻守兼備，更加令球迷欣慰。要喺車路士近年不穩嘅防線中搵一個可以倚賴嘅重心，隊長占士復出的確有能力穩定軍心。

所以，馬列斯卡期望隊長占士表現出更大嘅領導力，呢個係合理嘅要求，尤其今季有時都要靠羅拔山齊士上身神救，就知道防線問題有幾嚴重。當球隊受壓時，如果占士嘅坐鎮可以令隊友放心付託，話唔定進攻端亦可以發揮得更加淋漓盡致。Willhappy