黃劍文想做新版王傑Sell癡情等足8年終開Show眼濕濕感激周慧敏丨獨家

2024-10-18 08:00

入行8年，41歲黃劍文（Kimman）將於下周舉行首個演唱會《Stand By Kimman》，因為邀請到一直提攜他的周慧敏做嘉賓而講到眼濕濕。另外，他獲公司支持出新歌《默默》覺得好幸福，更笑言要當「癡漢」歌手。採訪：杜杜攝影：朱偉彥場地:The AIR (The ONE)

Kimman望以最佳狀態開個唱，頻頻健身，「想着背心騷吓手臂。」

Kimman早已放低開騷念頭，沒想到參加完《中年好聲音2》便有機會，「比想像中快，歌都未出就搞騷，真係好夢幻，做歌手都想有演唱會，等咗咁多年終於等到。」Kimman最感動前輩周慧敏忙搞個人巡唱之餘，仍抽空做嘉賓見證他的第1次，「當年冇諗過入行，係佢鼓勵我，又寫歌畀我，真係好幸福，人生遇到呢位前輩係可遇不可求，佢咁忙都用行動支持我做嘉賓，真係好感激。」

Kimman演唱會宣布門票已售罄。

周慧敏給Kimman既是家人又是老師的感覺。

周慧敏巡唱亦有邀Kimman任嘉賓。

Kimman提到前輩周慧敏，感動到眼濕濕。

做樂壇「癡漢」

Kimman覺得獲周慧敏提攜是因看到他愛音樂的心，「佢講過好感激哥哥（張國榮）寫《如果你知我苦衷》畀佢，提攜佢，相信佢見到我有自己作品，好純粹咁鍾意音樂，加上我成長故事，值得去幫同畀鼓勵。」在他眼中前輩有多個身份，「佢似家姐，又係老師，成日會提點我唱歌技巧，唔好用咁多哭腔同震音。」前輩亦影響到他做人態度，「佢好謙卑、溫柔，對我有好大影響，成日話近朱者赤近墨者黑，同咩人一齊就變咩人。」他又難忘入行後，被前輩一句話觸動，「幾年前好迷失，有次上節目唱歌，佢同我講做得好，仲話proud of you，我好感動喺屋企係咁喊。」

Kimman演唱會嘉賓，還有音樂劇拍檔葉巧琳。

Kimman感激歌迷「Kimchi Family」，經常以他名義做慈善。

Kimman脫離獨立歌手生涯，有公司支持出歌舒服晒，「嗰3年全部嘢一手一腳做，真係好攰，但好值得，知道辛酸會更珍惜，有公司支持出歌好幸福。」他最開心出歌有好大自由度，他笑指新歌《默默》的監製Johnny Yim，提議他做2024年版王傑，「好少有呢種歌手，我有呢個質地，我就向住呢個方向搵林若寧填詞，王傑嘅歌就係癡情，癡情漢，即係『癡漢』，哈哈！」