Jeffrey爆笑吹口哨神技搞喊陳蕾 同Kaho首合作互度驚人項目失晒控丨獨家
2024-10-17 07:00 
陳蕾、Jeffrey（魏浚笙）和洪嘉豪（Kaho）首度合作《Katch Our Life》音樂會，一年開咁多Show，叫三人為對方度一個一鳴驚人的演出項目去震懾觀眾，Jeffrey就自爆「吹功」了得，即場以吹口哨示範吹牧童笛絕技，由於太「技驚四座」，令陳蕾及工作人員笑到喊，再流住淚向Kaho「哭」訴，「你個Friend癲過你」。採訪：杜杜 攝影：羅安強 髮型:Haysses Ip@i Private i@heixx_(Kaho)、Cliff Chan@Myös@myos_cliffchan(陳蕾)、Holam Chong(Jeffrey) 化妝:Circle Chong@circlexoo(Kaho)、Tammy Au@tammyau_makeup(陳蕾)、Blair Chan(Jeffrey) 服裝:@lanecrawford(Kaho) 場地:BLACKROOM@blackroomhk
Jeffrey跟Kaho曾合作電影《超神經械劫案下》，再合作開Show好振奮，「電影時已結咗盟，十分期待，蕾記係新識嘅朋友，大家同一類，交流冇乜隔膜。」陳蕾覺得跟兩人合作好放鬆，「自己演唱會，自己歌，要好有message，但同佢哋一齊表演，只想令大家睇得開心。」Kaho跟兩人都熟，但開騷是首次，「今年做咗好多好困難嘅工作，開演唱會好大挑戰，好大壓力，可以有機會同佢哋一齊，畀我喺音樂上放多少少出嚟，好開心好減壓。」
互數缺點變瘋狂讚美
叫三人互數對方缺點，Kaho就瘋狂講反話讚陳蕾，「我就真係搵到佢哋缺點，阿蕾嘅缺點係太完美，喺佢隔離有少少慚愧，而笙記缺點就淨係睇到人哋優點，搞到我冇進步空間，我有時話，『你可唔可以講啲我唔好嘅嘢？』佢話你都冇唔好。」Jeffrey解釋：「基督教話，我哋只講成就人嘅說話。」陳蕾好無奈：「冇諗過我哋帶畀你咁多困擾，真係好對唔住。」Kaho再補充，「缺點太明顯，我頭先講啲嘢喺農夫訪問度抄返嚟。」
Jeffrey認為成就即讚賞，兩拍檔優點就好易搵，「缺點嚟講，真係點搵呀？！」Kaho笑着讚：「有戲㗎喎！」陳蕾認同，「對手要Kaho呢啲先帶到佢出嚟。」陳蕾好辛苦終於諗到兩男缺點，「佢哋太風趣幽默同靚仔，太易令人分心，我頭先答答吓問題，『我講緊咩話？！』成日分心，今日啲訪問都唔係答得咁好。」提到演出時兩男再悉心打扮點算？陳蕾直言好驚，「𠵱家都有啲手震，希望佢哋都睇住我囉！我盡量唔望佢哋。」
Jeffrey好鍾意示範
好辛苦先講完對方缺點，再要三人為拍檔，度一個驚天動地的表演項目。陳蕾笑言一直要求Kaho表演吹Di Dar，但對方「睬佢都傻」，Kaho強硬：「幾多群眾壓力都冇人可以逼到我！」陳蕾改向Jeffrey發功，「有冇興趣挑戰牧童笛？」Jeffrey秒回：「牧童笛OK，精英嚟喎！想當年大家都買白色牧童笛，我就特登買支黑色。」陳蕾追問：「有咩咁特別？！」Jeffrey解釋：「個款型啲囉，音質完全一樣，都響㗎！」陳蕾狂笑同Kaho講：「你個friend講嘢癲過你喎！」
Jeffrey知Kaho識吹Di Dar勁興奮，跟對方研究吹法，「Di Dar都係用吐音，牧童笛吐啲音出嚟響亮清晰啲，我以前玩長笛，係吐吐吐咁出嚟。」陳蕾聽到Jeffrey識吹長笛好愕然，但Jeffrey懶理佢嘅愕然，繼續用口哨示範何謂吐音，佢努力吐，全場所有人笑到喊，因為完全聽唔出同一般吹口哨有咩分別。陳蕾「喊」住話：「好多謝，唔該你嘅表演呀！」Kaho笑謂：「我真係想吐！」陳蕾叫大家幻想吓，若然Kaho的Di Dar同Jeffrey的牧童笛合奏會有幾精彩，「我諗佢哋練習，係咁對住我吐吐吐，到表演時真係好分心，真係驚！」Kaho提議Jeffrey可吊威吔飛住出場，陳蕾就可表演口中噴火，但太危險要Encore部份先好表演。Jeffrey就建議兩人可互數白欖，Jeffrey見大家不明同Rap的分別，又示範何謂數白欖，「我今日好開心，喺呢度做訪問！」由於場面再度失控，訪問被逼叫停。
最新回應