《完美物質》做女人憎死自己冇好下場丨頭條戲場

電影由法國女導演Coralie Fargeat執導，贏得今年康城影展最佳劇本獎，觀眾反應超兩極，有人讚正到爆不斷推介，強調「不能只有我睇到」，亦有人睇到嘔，甚至中途離場。電影屬「Body Horror」 即肉體恐怖類型片，有自我縫針、打到血肉模糊、及大量血漿爆射場面，加上充滿激情的配樂令尾聲怪物復仇記更癲更有速度感。因為導演超愛用近鏡，又情傾將一啲肉緊傷身鏡頭拍得好仔細，記得帶眼藥水入場。(今日上映) 撰文:廖思慧

61歲的Demi Moore Fit到爆炸。

Elisabeth 由紅星變健美節目主持人。

Elisabeth冇得撈後好討厭自己，成日照鏡感慨年華老去。

導演拍此片全因討厭社會對女性的歧視，「不論是衰老、肥還是身材走樣，『社會』就會話畀我哋知：『你玩完嘞，我哋唔想再見到你。』」然後，自己的身體成為自己的枷鎖，因為你老嘞，走晒樣，跟大眾想要嘅樣背道而馳，自覺一文不值再孤獨地老去。戲中女主角Elisabeth Sparkle(Demi Moore飾) 由叱咤風雲的荷里活紅星變健美節目主持人，因為老闆Harvey(Dennis Quaid飾)嫌節目老土又嫌佢過氣，不斷諗辦法用美言趕佢走，Elisabeth中年危機加上條氣唔順遇意外，入院後獲得神秘人提供回春妙法，打個電話就能令你由中女變少女。

Elisabeth一打完針就分裂咗一個後生嘅自己出嚟，背脊縫針都有仔細咁拍。

Elisabeth 的少女分身Sue。

Sue是Elisabeth的分裂體，即去電視台應徵跳健美操取代Elisabeth。

Sue是Elisabeth的分裂體，即去電視台應徵跳健美操取代Elisabeth。

勁Cult的返老還童
電影有大量裸露鏡頭，當然包括Demi Moore。導演表示：「就係需要一個有象徵性的女演員來詮釋Elisabeth，Moore處於相同階段，亦正正面對女主角Elisabeth的恐懼，以及呢種恐懼帶來的自我憎恨。」61歲的Demi Moore完全本色演出無可挑剔，瞓身演繹被唾棄的無助，唔介意將佈滿橙皮紋的身體公諸於世，真心佩服。

電影一開場已告知觀眾螢光綠色藥劑「完美物質」有咩用，就是打入身體就可以使細胞分裂，藥劑Package非常有型，有針有藥水有縫針工具兼畀分裂少女維生的脊髓液，然後，年華老去的Elisabeth選擇重啟人生，施打後的分裂反應非常嚇人，見到Elisabeth 的少女分身Sue(Margaret Qualley)出場，就知道一老一嫩將會互相傷害再玩死自己。

電影片長2小時21分鐘，對白唔多，冇半句廢話，冷場是零，美術構圖、光影運用超靚，唔伏，後勁超強，近年最好睇的驚悚電影。

佢就係衰格老闆Harvey，佢一講嘢個聲效超大，特別乞人憎。

Elisabeth每次都要包到實去秘密地方攞脊髓液。

Elisabeth跟Sue輪流生活一星期，一個現身就一個瞓覺，前者對後者玩得太癲好不滿。

Sue好靚但性格超自私，其實即係Elisabeth後生嘅性格。

Sue夜夜笙歌非常唔愛錫身體。

呢支就係回春液。