黃美棋艱苦營運4間餐廳：最緊要出到糧畀員工甜爆新婚生活幾攰都餵飽老公追蛇B丨獨家

2024-10-10 07:00

黃美棋和鍾健威（Ray）拍拖8年，今年4月拉埋天窗，做咗鍾太的美棋好識冧老公，幾攰都會餵飽對方，又主動斟茶遞水，獲Ray甜爆讚好。講到樂隊sp\'ACE在2019年解散時，Ray跟前隊友周吉佩鬧不和，他坦認當時確實唔愉快，但已主動聯絡對方化解積怨。最後美棋主力打理跟朋友合資的4間餐廳，市道有幾好大家好清楚，不過美棋話，「冇錢賺，出到糧畀夥計已經好好。」多謝良心老闆。採訪：杜杜攝影：朱偉彥場地:No.5 Studio

35歲美棋和39歲Ray對於生BB抱隨緣心態。

鍾氏夫婦因拍旅遊節目認識，2016年情人節認愛，因為相處太久，兩人笑言婚後好少互稱老公老婆，不過身份唔同咗，做了鍾太的美棋多了份責任，「覺得好攰，都要整嘢食畀佢，之前可能會『喂，你出去買嘢食吖』，見佢忙做嘢，係時候要斟杯水畀佢，以前會由得佢，哈哈！」對於太太愛的表現，Ray當然好受落，「佢唔會嗌老公，但我哋有養寵物，佢會叫爸爸飲杯水先，我覺得呢個動作好好。」兩人婚後財政獨立，未有共同戶口，家用主要由Ray負責，美棋笑言：「佢嘅錢依然係佢嘅錢，不過有時會將佢啲錢，擺喺我個銀行變咗我啲錢。」

美棋跟Ray拍拖8年，今年4月舉行婚禮。

不設防生兩個就收手

曾傳奉子成婚的美棋的確有諗過追龍B，「結婚嗰晚要中先追得到，都係放棄，蛇仔蛇女都得，隨緣啦。」Ray亦認同，「美棋都係蛇女嚟，good good㗎！」現在兩人不設防，更決定最多生兩個，至於仔定女就喜好各異。美棋說：「佢鍾意女，我鍾意仔。」Ray直言想有個女嗲自己，但生仔一樣歡迎，「會將我啲畢生絕學傳授畀佢，就係教佢無聊搞鬼百厭嘢。」

Ray在美棋手上奪得「年度星級人氣婚禮司儀」大獎。

Ray認為做婚禮司儀，成就別人美事也會感染到幸福。

另外，Ray於婚後4日便奪得「年度星級人氣婚禮司儀」大獎，美棋大讚老公仔叻叻，「佢好細心將一對新人嘅嘢編成故仔，再由佢把口講出嚟，好有心思。」當年無心插柳為朋友做婚禮司儀，結果口碑好，一做就10年，所以Ray開心奪獎獲肯定，「試過1年做40幾場，1個月都做2、3場。聲線磁性啲感性啲，賓客會聽得好舒服，有時加啲搞笑嘢會好好氣氛。」

早前美棋陪Ray到法國工作兼旅行。

美棋和Ray不時拍網片，近期以新婚主題就主。

疫情求生瞓身搞製作

美棋在TVB多做主持工作，只能自製機會滿足演戲癮，「最近拍飲食片多，有個周圍食嘢嘅『美棋B餐』主題，婚後就做多少少新婚夫婦出發嘅搞笑片。」另外，美棋亦會親自剪片，唔再依賴Ray，「疫情令Ray嘅主持工作停晒，坐喺屋企3個月冇收入。」經朋友介紹，Ray變成斜棟族，做司儀外搞埋製作，主要客戶是理工大學及馬會，「我負責做導演，寫及錄埋VO，譬如係大學唔同學系攞嚟招生，或者啲研究攞咗好多獎，將結果拍成Video。」至於美棋在TVB工作不多，主力打理跟朋友合資的4間餐廳，其中一間Ray都有份，她坦承巿道差，搞食肆難賺錢，「𠵱家叫做頂得住，出到糧畀夥計已經好好。」

美棋和Ray跟做建材生意的朋友開設Studio兼陳列室。

年前美棋有份投資的食肆開幕，Ray都有到場支持。

美棋亦有跟朋友投資食肆生意，但巿道差只能打成平手。

與周吉佩已甚少聯絡

曾是樂隊成員，Ray對再做歌手零興趣，只限玩票性質，「唱吓cover算，我唔係流住唱歌嘅血，阿吉（周吉佩）先係。」講到周吉佩參加《中年好聲音》奪冠，他亦替前隊友開心，「恭喜佢㗎！佢應該參加，因為佢係流住唱歌嘅血。」Ray認為sp\'ACE解散令大家各有去路，「行返自己嘅舞台發光發亮。」對於有指他跟周吉佩鬧不和，Ray承認兩人已甚少聯絡，「我睇好佢比賽有好成績，但已經冇聯絡。」因為自覺結婚大個仔，Ray認為是時候清走沙石，所以婚前有主動聯絡對方，「邊個啱邊個唔啱都好，都冇所謂，行出一步去溝通個結已解咗一半，佢都有回返message畀我，後尾各有各忙，都冇再溝通落去。」