王賢誌投資7位數蝕住拍同志真人騷首揭放棄TVB轉投ViuTV播放之謎丨獨家

2024-10-04 07:00

王賢誌首揭放棄TVB安排ViuTV播放之謎投資7位數再拍同志真人騷《Boyscation Too》丨獨家

繼2022年製作香港電視史上首個男男配對真人騷節目《仔仔一堂》後，王賢誌（Vinci）投資幾百萬再製作《Boyscation Too》，播放平台由TVB轉到ViuTV。Vinci講得坦白，新合作關係好開心，可以話晒事，最開心可以圓夢，預咗蝕做都冇所謂。而他親自揀選的參加者個個高質，最突破是成功從網上搵到來自廣州的20歲美術系大學生。採訪：杜杜攝影：朱偉彥

Vinci花了大半年製作《Boyscation Too》，雖然大壓力，「但我話事，好有滿足感，大家鍾意或欣賞係最大回報。」

Vinci表示《仔仔》反應不俗，將《Boys》轉到ViuTV播是想開拓不同層面觀眾，「上次TVB播迴響好好，但喺同一個地方再播同類型節目，都係嗰班觀眾，feedback差唔多，不如喺ViuTV播。」最重要是Vinci想「集齊一套」，「喺呢個圈咁多年做過晒咁多傳媒，亞視、有線、Now觀星台，3間電台，係Viu未做過，如果Viu有自己節目又幾好喎！」

2022年《仔仔一堂》推出時，引起不少迴響。

節目在峇里取景，參加者通過各項遊戲進行配對。

節目中，參加者有不少親密舉動。

自己投資自由度更大

Vinci經熟人穿針引線跟ViuTV合作，今次由他全力投資，「係幾百萬以上，我哋budget好大，10個仔加我，再加梳頭化妝，已經10幾人，仲有幕後製作、寫稿、導演、攝影師，成40幾人去峇里，留咗6日，機票酒店仲有食，拍嘢又有好多開支，好似放場煙花，為咗節目好冇辦法。」他坦言很喜歡這個合作模式，因為話事權多了，投入程度更大，「合作模式好特別，可以話電視史上未試過，上次係外判節目，資源係TVB，製作完幾時出，最後delay咗1年先播亦唔到我決定，因為版權係佢。」但今次不同，作品屬於Vinci，「Viu只係播放平台，海外平台都自己去傾，版權都係我嘅。」他認為這個模式有機會成為未來趨勢，「外國好早已有，等如藝人唔係永遠1間電視台，跟唔同電視台合作都得。」

每位參加者都由王賢誌親自邀請。

Vinci提醒觀眾要珍惜這次機會，「搞一輯節目好難，要好多backup、資源，香港有幾大，我搵一轉起碼100個人，有好多人推咗我。」他又坦認花7位數製作冇諗過回本，「就咁喺電視播唔會回到本，我唔係為賺錢，所以我係癲㗎，冇人會做件咁嘅事，我係攞嚟發夢㗎咋！」他認為賣埠回本的機會亦不高，「𠵱家個時勢，點回本啫！吊高嚟賣又冇意思，希望多啲人欣賞到節目，多啲正面回應，希望個節目受歡迎，有啲後續，搵返少少幫補。」

四個參加者因拍攝節目變得老友鬼鬼。

網上搵到廣州參加者

Vinci堅持製作這節目純為圓夢，「30年前讀完書返嚟入電視台，新人做起，好驚俾人知性取向影響工作，所有嘢好收埋，又唔鍾意飲酒去蒲，點識人啫？！有好長時間冇拍拖，識嘅就係工作上嘅拍檔，人哋未必係（基），嗰時又好想喺工作上拼搏，去啲監製房搵機會，隔咗咁多年自己做監製，搞個男男配對節目，其實係衝破晒我以前好多枷鎖。」他笑言一班參賽者超幸福，若然有機會他都想參加，「我好想做佢哋囉，拋個身出嚟玩，每日最佳狀態出現，有人幫你搞晒所有嘢，約咁多咁優秀嘅人畀佢哋認識，每日除咗瞓覺食飯，就係媾仔，喺邊度搵咁好，仲可能因為有知名度，會有其他機會。」

20歲Kurt在廣州是大學美術系4年級學生，童年好鍾意苗僑偉，目前男神是張敬軒。

Tyler承認醫生身份難公開性取向，現從事醫美自由度較大。

Stone是專業調香師，因為疫情跟同性伴侶分歧漸大而離婚，希望未來另一半跟家人關係好。

凍肉店店長Kendrick，因為父母離婚令他10歲開始跟同性拍拖。

Vinci今季繼續親自搵參加者，更由熟人開始，「碌電話嘅phone list，覺得OK就搵，大部份2字頭，最後生20歲，我全部生得出有找！」最年輕的參加者是自廣州的Kurt，在IG發掘，「佢都有10幾萬followers，好紅，見佢啲相幾靚仔幾得意咪follow，直至見佢啲story喺香港。」Vinci想到可以邀請他參加節目，於是約了Kurt食飯，「佢唔識我，有上網查我係乜水，知道真係有王賢誌呢個人，佢再嚟香港已經係同我哋去峇里，都幾神奇。」