彭秀慧逆巿自資搞舞台劇：唔知仲有冇機會 去喪禮多過去婚禮突然睇化晒丨獨家

相隔10年，49歲彭秀慧再度自編自導自演自資全新舞台劇獨腳戲《失憶【諒解】備忘鹿》，巿道低迷通街吉舖，仍夠膽自資製作，彭導坦認有壓力。近年經歷媽媽患腦退化離世，好朋友又相繼選擇先行一步，面對生離死別，彭秀慧自言心態唔同晒，反而更珍惜每次創作機會，「我經歷過生死，人生睇得好化，當下係好緊要。」採訪：杜杜 髮型: Jo Lam@Salon Trinity 化妝: Iris Luk 服裝: Maje 場地:@momento

彭秀慧這幾年思想變化很大，很多事已不再執着。

彭秀慧以鹿角造型，為《失憶【諒解】備忘鹿》拍攝海報。

《失憶》講述沒家庭的女主角突被裁員，慢慢發現記憶變得混亂，要趕及處理跟媽媽的心結，劇作表達的就是整理回憶的過程。故事啟發自彭秀慧患腦退化的媽媽，「失憶係幾殘忍，呢個係我創作嘅起點，失憶即係忘記，以為忘記咗就解決咗啲嘢，其實仲有啲結未解，嗰種解決係諒解，更加可能係明白，作為女人同媽媽嘅關係好糾纏，互相明白，但又互相唔諒解，好奇怪嘅關係，我都經歷過反叛唔明白，甚至唔鍾意到極點，但時間一過已經去到媽媽當日年紀，思想或者容易啲代入。」

彭秀慧母親於2022月9月病逝，令她反思了很多。

彭秀慧很珍惜跟88歲父親的相處時光。

唔知仲有無機會再做

相隔10年再寫獨腳戲，雖然攞苦嚟辛，但彭秀慧認為只有這種形式，才能夠表達所思所想，「正如跑馬拉松，點解攞苦嚟辛？！你知跑得過，一切都係值得。」彭秀慧上次獨腳戲《Tiffany》是講婚姻，近年她發現去喪禮多過去婚禮，所以更有衝動去創作，「呢幾年經歷咗好多事，好多幾大嘅轉捩點，呢個年紀處理離別、死亡，唔止去喪禮仲搞埋，加埋個世界變得好誇張，又要處理自己開始邁向下個階段，睇嘢唔同咗，喺呢個空間、時間，有少少逼自己做，有啲嘢唔做可能就會過咗，唔知下次仲有冇機會、體力做，所以要寫囉！」

彭秀慧上個獨腳戲《Tiffany》以婚姻為主題。

好友林皓霆（Charles）去年10月先行一步，彭秀慧好難過。

撞城城歌名問准小美

劇名《失憶【諒解】備忘鹿》跟1995年小美填詞的郭富城歌曲《失憶【諒解】備忘錄》很相似，彭秀慧坦承兩者有很大關連，「件事太神奇，個名一路kick住我，點講都好似太沉重，我唔鍾意入到劇場唉聲嘆氣，於是上網打失憶，就出咗郭富城隻歌，再聽就發覺聽咗咁多年，原來冇了解過歌詞，我用唔同角度去解讀首歌，最初想講明白，但係尋求多一種情緒就係諒解，但諒解嘅前題有憤怒喺裹面，個歌名畀咗啲嘢我。」而「備忘錄」變成「備忘鹿」，她解釋當時腦海彈出鹿，她好喜歡的動物，「鹿代表善良、智慧，有種與世無爭感覺，我諗回憶擺喺個腦，記憶走咗會走咗去邊？！變咗隻角，備忘鹿嘅鹿角，係象徵嘅意義。」

彭秀慧的劇名已問准小美，她亦有去欣賞城城演唱會。

劇場10年慶幸未輸過

巿道低迷下自資製作，彭秀慧坦認有壓力，「成日都唔識驚，唔知係好定唔好，但係我以前一路都係咁做，由第1次自資係申請政府錢，攞咗3300蚊起動費，之後就好似個師奶仔咁，打麻雀贏咗啲錢唔使，下次再做就攞出嚟，都搞咗10幾個騷，每次都諗要儲多啲本，唔知下次會唔會輸。」幸好她是個「長勝將軍」，「坦白講每次票房都唔錯，由2005年開始到2015年，10年時間做咗好多獨腳戲，雖然作品得4個，但不斷重演，好努力去經營，儲咗班頗忠實嘅觀眾，就算2015年後做咗電影，都會掛住劇場，仲想將睇電影嘅人拉入劇場，同劇場連繫好深。」

彭秀慧自編自導自演的獨腳戲《29+1》，令她知名度大增。

2017年彭秀慧將《29+1》改編電影，由鄭欣宜主演。

拍成電影版的《29+1》成功帶了不少電影觀眾入劇場，但她認為社會運動、疫情令所有事大洗牌，所以抱着做得一次得一次心態，去行未來的創作路，「之後係點我都唔知，有機會再做舞台劇又好，再做電影又好，我經歷過生死，人生睇得好化，當下係好緊要。」她慶幸能夠再將想法放入作品，但會提醒自己不要被電影導演身份影響，「大家叫彭導，我會講唔好畀呢啲嘢霧化咗自身，導演都係要做作品，指揮千軍萬馬都要做想講嘅嘢，跳返去獨腳戲，我係演員，劇場係提返我個本質，做導演孭住好多嘢，唔可以喺現場崩潰，但舞台上我仲可以自由呈現任何狀態嘅自己。」

彭秀慧認為舞台劇和電影很不同，兩種創作模式都不會放棄。

2018年，彭秀慧憑電影《29+1》奪金像獎新晉導演獎。