李芯駖童年任睇三級血腥電影：《力王》好深刻 陳湛文李靖筠輪住爆老竇暗黑教育史丨獨家
2024-09-19 07:00 
41歲陳湛文（Peter）、31歲李靖筠（Gladys）和38歲李芯駖（Sumling）＠COLLAR在新戲《望月》中是一家人。電影講述原生家庭對仔女成長的影響，三人坦言現實亦一樣， Peter及Sumling就分別因為爸爸嘅嚴厲及嗜好而培養出創作和藝術天份，而Gladys就被父親當仔咁養，大個變咗男仔頭，採訪：杜杜 攝影：朱偉彥 髮型:Sing Chan@BRUNEBLONDE(Gladys)；Lisa C.Makeup Art(Peter)；Ricky Lam(Sumling) 化妝:Angel Mok(Gladys)；Lisa C.Makeup Art(Peter)；Janice Wong(Sumling) 服裝:Polo Ralph Lauren(Gladys)；eye\'s Buddy、New Balance(Peter)；Peter Do、Prada(Sumling) 造型:Daniel Cheung(Sumling)
Peter和Gladys早於2019年《碎紙機的告白》MV及2022年ViuTV劇《IT狗》合作，在《望月》就演兄妹，份外有默契。而初次拍戲的Sumling便考起飾演「老公」的Peter，「佢好黐線，問我咩叫好演技呀？！嘩！大佬點答呀！你試吓問梁朝偉呀？！」Sumling笑謂：「我就係想睇吓你點樣答！」Peter鬼馬話：「唔制呀，好似捉錯處咁！」Peter笑言當時跟Sumling展開漫長的藝術討論，最終搵戲中演他鄰居的演藝師兄弟幫拖，Sumling解釋：「關於戲劇，佢會推介唔同嘅老師，嗌我留低睇埋阿卵（楊偉倫）演出。」
搭火車望雲激發想像力
三位主角承認現實世界亦深受父親影響，Peter先分享跟陳爸爸的經歷，「細個搭火車去探阿嫲，老竇好鍾意途中叫我，望住啲雲，諗吓見到啲乜就講出嚟，係嚴厲嘅。」Sumling搭嘴：「咪好似罰咁！」Peter亦認同，並表示當時細個只會照做，大了就發覺有好處，「應該係嗰時種咗啲種子落右腦，望住啲雲不停咁變唔同形狀，會激發少少想像力，我深信阿爸唔想我一嚿飯咁，可能我細個太『摺』。」Gladys問：「你會唔會承傳落囡囡？」Peter表示會同囡囡一齊做，「呢嚿雲似咩呀！」Sumling讚這個育兒方法不錯，被讚的Peter得戚補充：「都要消化到先得，如果我覺得佢（父親）嗰時咁惡，𠵱家唔鍾意啲雲啦！」
走廊打側手翻打到為止
Gladys認為男仔頭性格全因為爸爸，「細個啲女仔都係學琴棋書畫，但我阿爸好鍾意教我踢波，逼我喺走廊打側手翻，勁窄喎點打呀，佢一定要我打到為止。」Peter原來都有類似經歷，「老竇有叫我做一字馬！」每年暑假，Gladys爸會安排她入summer camp，「佢想逼我獨立，硬淨啲，我大大吓開始唔鍾意着裙，最鍾意超人，可能我好想得到老竇attention，佢唔鍾意我玩煮飯仔，鍾意我踢波，慢慢偏向鍾意嗰啲嘢。」
Beatles黑膠由細聽到大
Sumling出身於破碎家庭，母親曾被父親家暴要報警求助，不過她認為全靠熱愛音樂的李爸爸滋養了她的音樂細胞，「爸爸好鍾意聽黑膠碟同卡式帶，Bee Gees、Beatles嗰啲，《重慶森林》soundtrack都識背，嗰時唔知咩嚟，1日聽足10個鐘。」而媽媽對她的思想教育亦根深柢固，「媽咪就犀利，由細到大訓練我，有咩事都係講1句說話，就係玉不琢不成器，佢話粒玉唔琢唔得，𠵱家你咪要啄囉！」Peter多口問句：「你會唔會問阿媽，點知你係咪粒玉呀？」Sumling扮媽咪答：「你唔啄就一定唔係囉！由細到大我都知我要啄嘅，你啄我啦！」小時候爸爸除了讓Sumling任意畫牆，養成她對畫畫興趣，還任她接觸漫畫及兒童不宜的三級電影，「細個好深刻就係《人肉叉燒包》嘅影帶，仲有《力王》，嘩！點解世上有啲咁嘅戲，剪自己血管出嚟綁個結，又打爆個牆，爸爸又好鍾意睇漫畫，所以我睇好多漫畫，阿媽就完全唔鍾意藝術，淨係鍾意打麻雀，一個好藝術同好理智嘅我就係咁合成。」
最新回應