苑瓊丹榮升「香港女科學家協會」副會長 結婚20周年快樂不知時日過

一向諗頭多多嘅苑仔（苑瓊丹），計早前被獲封公主名銜，呢日又有新嘅「身分」，榮升「香港女科學家協會」副會長，日前喺會議展覽中心舉行揭幕典禮。 苑仔就話自己一直研究新科技，仲話自己層次「升級」：「由細到大都冇諗過自己同科學家沾上關係，由『師傅』帶我接觸科學，發現呢啲嘢唔係高高在上，唔係遙不可及嘅！接觸科學之後令自己大開眼界，想透過科學健康咁『活多幾年』。 」 

苑仔對科研感興趣。

苑瓊丹榮升「香港女科學家協會」副會長。

香港女科學家協會舉行開幕式暨就職典禮。

好友林子聰都到場慶賀。

早前苑仔趁休息通經絡，手臂有明顯瘀痕。

交遊廣闊嘅苑仔榮升副會長，好友林子聰都到場慶賀，仲滿場飛四圍送禮猶如「男主人」：「近日香港嘅腐乳令到香港好失望，香港人好似冇咗手信，𠵱家我地努力不懈，研發令到佢無菌，我地會搞呢啲研究。善用科學改善生活，搞到𠵱家頭髮都多咗，可以供獻比社會。」林子聰亦附和支持，笑指二人「傾傾吓」就落實研究：「其實所有科學都係由發夢開始，只有創新先係科技，同我地拍戲都係一樣。」苑仔講笑話林子聰搵自己做女主角，搞到票房唔收得，自己「𠱁掂」林子聰做直播齊齊搵真銀！  

苑瓊丹和老公黃乃掦結婚20周年仍然恩愛。

年輕時嘅苑仔眉清目秀。

苑瓊丹(前)跟周星馳合作電影《唐伯虎點秋香》，演石榴一角闖出名堂。

電影《九品芝麻官》劇照。

2019年的《街坊財爺》金牙嬌是苑瓊丹在TVB的最後劇作。

苑瓊丹享受做直播帶貨，可以做女主角好有滿足感。

苑瓊丹被冊封為苑公主。

苑仔對護髮都好有心得。

剛剛渡過生日及結婚周年紀念，不過苑瓊丹就忙到「冇時間」慶祝，趁返香港同「玻璃大王」富商老公黃乃揚「補祝」：「𠵱家幾十歲唔使慶祝，最緊要家和萬事興、身體健康！我都唔知結婚20周年，真係快樂不知時日過，證明我婚姻生活係美滿嘅。」 苑仔忙於做生意和直播，捱到周身傷，早前趁休息去通經絡，手臂有明顯瘀痕，佢就搞笑話無被老公「家暴」，如果真係有時會直播同大家求救！