秦煌中秋前掛住冇血緣「囡囡」甜爆相處點滴 首公開45歲內地情人清秀靚樣：唔介意佢跟返老公
2024-09-17 05:00 
76歲行動不便的秦煌要入住護老院，未能到湖南跟情人Mary及無血緣關係的9歲「孻女」相聚，無奈被逼分開，不過，雖然關係已成過去式，但煌哥一提起「兩母女」依然好甜。《頭條日報》記者在中秋節前夕探訪煌哥，他跟記者分享母女溫馨相，45歲Mary首度曝光，相中的Mary五官端正，化起淡妝，紥起頭髮又手托香腮，笑容非常親切；至於「囡囡」徐子欣就圓口圓面相當精靈，煌哥更坦言仍然幫「囡囡」交學費。採訪：方騫平
每逢佳節倍思親，入住護老院3個月的秦煌懂得自得其樂，他滿足道：「中秋節有你哋及馬海倫送月餅及零食，陪我傾吓偈，有咁多嘢食，我經已好開心㗎嘞…中秋節唔需要仔女同我去飲茶，仔女鍾意嚟就嚟啦，我冇事。」其實煌哥最記掛Mary及9歲「女兒」。
女友跟「女兒」父親同住
談到Mary近況，煌哥坦言她跟徐姓老公同住，隨即解釋Mary並非無情無義：「當年Mary唔係跟佢，時隔好多年啦，都冇乜所謂嘅。」承認幾大愛的煌哥還補充說：「我唔care，佢哋應該係一家3口嘛，而且唔係佢攞我啲錢，係我畀錢佢，錢對我嚟講睇得好開，所以冇遺憾。」他堅持：「如果我好想見佢哋就畀錢，因為兩母女一上一落要超過1萬蚊，但我都年紀大又唔係好想用嗰啲錢，想留返啲錢喺度。」語畢，煌哥表示好想有人陪他北上：「我當年收埋20幾萬嘅普洱茶餅及名貴玉佛喺佢間屋，加埋超過100萬，都曾質疑過『佢係咪想賣走我啲嘢？』原來一粒(茶葉)都冇少到。」
笑談快樂溫馨「父女情」
在煌哥手機相簿中收埋唔少「囡囡」生活照，包括7歲時慶生、游水、學校跳舞表演及領獎等，但Mary僅得一張，他解釋：「我唔係唔愛佢，如果唔愛，𠵱家就有好多女朋友啦，我都唔花心嘅！」提到「父女情」，煌哥由個心甜到出嚟：「佢11個月大，Mary就帶佢過嚟深圳同我一齊住直至兩歲，個𡃁妹唔係叫我做『爸爸』，但唔記得咗佢點叫我；佢跟生父姓徐，我亦唔想佢跟我姓梁(原名梁日成)。」煌哥激讚徐子欣：「佢好叻又好好玩嘅，同我好好感情，好掛住我！最記得佢成日偷用阿媽啲化妝品，劃到自己大花面，俾阿媽追打時就會匿喺我後面…哈…總之我好喜歡佢視如己出啦，見到佢就開心。就算後來疫情我返唔到上去，甚至𠵱家咁狀況，仍然會照顧佢每年萬幾蚊嘅學費。」雖然煌哥目前靠綜援，但節衣縮食下仲有少少錢可補貼兩母女：「有時仲會畀多3幾千佢哋做生活費，作為一個男人應該要畀佢，因為當日我有家室及工作唔願意同Mary生仔，曾拍心口答應過佢，即使冇血緣我都同佢養。」秦煌堅定地連講兩次：「我唔係嗰啲人嚟(怕蝕底)。」
掛住睇電視唔瞓被投訴
另外，煌哥稱𠵱家安樂晒，日日都咁開心，不過，他都會「老頑童」上身扭吓計，他不悅自爆：「俾人投訴話我唔瞓覺喎，我瞓唔到嘛大佬呀！」因此，他自家設計，用紙盒圍住電腦，睇電視時就會減音。他洋洋得意說：「你估我蠢呀！」語畢又得戚說：「要我瞓覺啫，𠵱家我咪瞓喺度（睇電視），瞓畀你睇囉…我會調校高床頭，再用枕頭抬高對腳慢慢睇，睇睇吓咪瞓到囉。」當日換上短褲坐在輪椅上的煌哥，小腿位置被紗布包住，兩腳腫到發黑，問到晾高腳瞓是否有助消腫？老人家卻迴避說：「冇事，唔係腫，醫生話冇嘢，最緊要郁得。」但他承認，因為食去水丸，每日會屙半桶尿：「我雙腳係瘦咗，一着鞋感覺鞋籠鬆晒，但依然著返45碼。」煌哥指醫生冇要求他戒口，但都會乖乖地食少啲膽固醇高嘅蝦蟹：「呢度伙食算係ok，飯餸唔啱胃口或者肚餓嘅話，夜晚7點叫外賣，柯打蒸嚿魚。」
最新回應