前亞姐曾小燕驗出腦瘤！有士多啤梨咁大即做開腦手術：驚個腫瘤會爆
2024-08-31 09:00 
曾經為「露毛事件」而成為新聞人物前亞姐亞軍曾小燕，在90年代離開了娛樂圈，鮮再踏足娛樂圈工作。差不多有逾15年未有現身幕前的曾小燕，早前現身好友鍾慧冰的YouTube節目《冰姐的花樣人生》，除了重提「露毛事件」對她影響極深外，原來疫情前後曾經遇上兩場大病，一度在鬼門關徘徊，同時亦認清身邊人的真面目。
相關閱讀：前亞姐曾小燕激罕現身！重提「露毛事件」影響極深 去年曾接受大手術死過翻生
曾小燕曾遇上兩場大病一度徘徊鬼門關：
神隱多年的曾小燕今次再度現身，雖然臉上有不少歲月痕跡，但變化未算有太大分別，令不少網民感到驚喜。在節目上，鍾慧冰表示疫情前兩人曾見過面，當時曾小燕外貌，竟然被她誤會是「整容失敗」，鍾慧冰笑說：「嗰次見面覺得佢個樣怪怪地，口腫面腫，鼻又好似好大，以為佢整咗容，仲覺得佢整得唔靚。跟住有朋友忍唔住佢，先知原來當時係免疫力出現問題。」原來曾小燕的姐姐有紅斑狼瘡症，想不到她的免疫力亦出現問題，她說：「所以要食類固醇，食完之後口又腫面又腫，都搞咗一段幾長嘅時間。」
去年曾小燕又陷另一低潮
想不到去年曾小燕的人生又陷入另一個低潮，竟然發現腦部有一個腫瘤，雖然曾小燕目前已經康復，在節目上淡淡然憶述當時的情況，但實際上相當驚險，幸好最後逃離鬼門關，曾小燕說：「其實算係不幸之中嘅大幸，嗰陣因為疫情冇返嚟香港好耐，亦都冇做身體檢查，醫生話通關可以返嚟香港，咪做過Body Check。當時做Body Check好簡單，入去住一晚，第二日就出院。嗰陣仲係我自己一個人入去，好精神，乜事都冇，點知上床瞓覺嘅時候，個頭有啲暈，咪諗住瞓吓，點知瞓瞓吓覺得天旋地轉，有啲唔對路，咪撳鐘叫姑娘入嚟，話我唔舒服，個頭好暈，仲想嘔。」
曾小燕身體檢查驗出腫瘤
她續說：「跟住姑娘攞咗個袋畀我，我真係嘔，嘔完再量我啲血壓，發現去到好高，於是即刻call醫生做檢查，點知一check發現個腦有個腫瘤，醫生話好彩我喺醫院發現，你知女人頭暈身㷫一定有，如果喺屋企咪啪粒止痛丸瞓一覺咪冇事，好彩今次係喺醫院check到有一個腫瘤喺個腦度。」她還說：「因為我嘅醫生唔係嗰科，好彩喺醫院有神經外科醫生，咁就約見咗神經外科醫生，發現喺右邊額頭位置真係有一個腫瘤，有士多啤梨咁大，個腫瘤壓到腦中間嗰條線已經歪咗，醫生建議我必須要做個過開腦嘅手術。」
曾小燕：覺得係個天冧落嚟
曾小燕坦言當刻的心情是「覺得係個天冧落嚟」並說：「點解係我？完全冇諗過點解自己會有呢個病，醫生仲話一定要切除咗先知道係良性定惡性，當時真係六神無主，囝囝又喺外國讀緊書返唔到嚟，我又得自己一個，唔知可以點做，我都有搵其他醫生聽下佢哋嘅意見，我睇咗4個醫生，佢哋都話必須要做呢個切除嘅手術，如果唔做，驚個腫瘤越嚟越大，甚至會爆，係非常之危險。」最後聽醫生的建議，在一個月內進行切除手術。
曾小燕昔日工作相：
談到手術過程，曾小燕說：「要剃晒右邊嘅頭髮，好感謝醫生團隊好成功同我做呢個手術，個腫瘤割咗出嚟係良性，好感恩，嗰陣見醫生同等緊做手術，望下個天空原來係咁大，咁靚，我有好多樣嘢係未見，好多樣嘢係未行，我都有問自己應該要點做？」然而最令曾小燕感到傷害的事，竟然是身邊朋友的反應，她說：「當時屋企人同好多朋友都知道我有呢個病，其實有安慰，仲都有人驚咗我。你知唔係每個朋友有義務去幫你，可能有啲朋友覺得呢啲唔係好lucky嘅嘢，就唔想見，咁我都唔怪佢，佢哋冇義務去聽你嘅嘢，去幫助你。但係都有一班雪中送炭嘅朋友，喺我最唔開心嘅時候，喺我身邊陪伴我，支持我，經過呢一次，你會知道邊啲係真心嘅朋友，邊啲係酒肉嘅朋友。」
曾小燕因病認清身邊朋友
曾小燕坦言曾為此感到不開心，但她說：「要平衡自己嘅心態，因為我要面對呢個咁大嘅手術，但係又要諗人哋嘅感受，人哋有冇義務先？係冇㗎嘛。但係仲有關心你嘅朋友喺度，點解唔諗吓佢哋？反而執着諗啲唔開心嘅事情，咪更加唔好。每個人都有唔同嘅諗法，我哋唔可以諗人哋點諗，最緊要係自己。」幸好在這段時間，因為這個人的出現，令她感到療癒，她甜甜地說：「呢個人係周深，聽過佢嘅歌嘅人，都知道佢把聲好好聽，真係 天籟之聲，當我有呢個病之後，心情唔好嗰陣時，就會聽佢啲歌，發覺好治癒我嘅心情，情緒唔會好高漲，慢慢調節落嚟，真係估唔到。」
曾小燕病癒成為追星一族
自此之後，曾小燕成為追星一族，她笑說：「我未試過追星，估唔到好番之後竟然有呢個機會，周深喺深圳有個巡迴演唱，買唔到飛，我喺成都有啲朋友，我咪叫佢哋幫我買到一張，所以我喺澳門飛過佢，我未試過，係第一次，真係非常之好睇。」還有一件事令曾小燕感到開心，就是她的寶貝仔已經碩士畢業，她說：「佢而家喺香港一間大學做關於腦退化症嘅研究，我真係好安慰，佢知我自己一個人咁多年，而且個病啱啱先好番，佢都願意喺我身邊陪住我，我仲開始收到個仔家用，已經收咗4個月。」
其他文章：
選美考古丨亞姐是非一籮籮！宮雪花虛報年齡 97年冠軍被爆任職娛樂場所
最新回應