蔡潔甜笑誤洩黃宗澤暱稱「波波」 擦鞋式激讚緋聞男友零缺點丨獨家

蔡潔在《法證先鋒VI：倖存者的救贖》再演法醫「Dr. Fan」，對於第7度跟緋聞男友黃宗澤（Bosco）合作，她力讚男方好照顧人，會煲湯包伙食，又欣賞對方能輕鬆面對壓力，完全冇避忌，甚至讚到要自己叫停自己，好好笑，但最爆女方唔覺意洩露男方暱稱，關係真係唔簡單喎！採訪：杜杜 攝影：朱偉彥 髮型:Terrence Chan @HaiR 化妝:Chloe Yu 場地:Velo Italian Bar & Grill

蔡潔對Bosco有讚冇彈，講優點講到停唔到。

蔡潔對Bosco有讚冇彈，講優點講到停唔到。

蔡潔對Bosco有讚冇彈，講優點講到停唔到。

蔡潔再演「Dr. Fan」跟首演時感覺大不同，但好快投入返角色，「創作時加入蔡潔嘅元素，譬如工作時比較果斷，有用唔完嘅精力，將呢啲工作態度放落去。」蔡潔在《法證V》被關楚耀綁架，最後還殺了對方，震撼場面令觀眾好深刻，今輯兩人「續前緣」，阿關演另一角色，但關係依然複雜。問到會否再有震撼場面，她就大賣關子，「阿關演另一個人，一開始只係跟舊阿關生得一模一樣，但慢慢發現唔係咁簡單，心理上幾壓抑同恐怖。只可以講我都會瞓上解剖枱，但會用另一種方法呈現驚慄。」

《法證V》蔡潔被關楚耀綁架，觀眾印象好深刻。

蔡潔在《法證VI》跟關楚耀再合作。

蔡潔預告《法證VI》會瞓上解剖枱。

讚埋袁偉豪避免尷尬

蔡潔跟Bosco的緋聞傳足3年，追問目前關係如何？她就笑得好甜：「我哋都唔知點解會傳緋聞，一路都係好好嘅朋友、拍檔。」她坦認Bosco作為前輩很照顧她，「Bosco好照顧身邊人，係好體貼嘅人，尤其食嘢方面，會煲湯畀大家飲，『波記廚房』就街知巷聞㗎嘞！」2018年，蔡潔簽約邵氏首劇《飛虎之雷霆極戰》便跟Bosco合作，之後經常在男方身上偷師，「覺得自己嗰時係𡃁妹，跟住阿頭、大佬做嘢，一路偷師。男士拍《飛虎》有好多體力上挑戰，佢仲整斷咗隻腳坐住輪椅拍，依然好樂觀去接受嗰個狀況，好佩服佢，果然做得大佬都有原因。」

蔡潔同Bosco開工，梗係一齊慶祝生日啦！

《飛虎之雷霆極戰》時Bosco傷住腳，依然笑着開工。

跟Bosco變熟成為朋友，蔡潔更加佩服對方，「佢除咗拍戲仲要兼顧生意，會好盡力去完成手上嘅事，一個咁成功嘅人都咁努力，我都要更加努力。」追問拍《法證VI》的偷師地方，她再現甜笑，更誤洩Bosco暱稱，「再講變咗擦鞋，哈哈！唔好成日淨係讚佢，佢同Ben（袁偉豪）都係我前輩，好多人都值得學習，唔單止係Bo Bo（波波）。」呢頭講完唔好再讚，轉頭又讚Bosco。「佢無時無刻都用個輕鬆心態面對所有嘢，我見到都會放鬆啲。」

蔡潔跟「Bo Bo」好合拍又好襯！

蔡潔唔想讚「Bo Bo」太多，所以讚埋袁偉豪。

朝張艾嘉吳君如方向

早前蔡潔自資6位數，以她首本小說《夢的轉場機器》的一個故事作藍本，跟本地漫畫家曹志豪合作推出漫畫《81》。而讀電影出身的她仍有個導演夢，當時她表明想將故事拍成電影，而故事原來亦曾變成電影劇本，「當時睇過呢本書嘅人，話故事特別有電影感，既然大家都覺得有可能發展咪改囉！」可惜最終未能成事，不過她並不心急，「細個啲會急於成事，歷練多咗，知有啲嘢唔急得，寧願等最合適嘅timing，當然會好積極去present、去修改，希望等到時機出現，我可以接得住。」

2019年，蔡潔推出首本小說《夢的轉場機器》。

早前蔡潔跟本地漫畫家曹志豪合作推出漫畫《81》。

若有機會執導，蔡潔講明不會親自演出，「𠵱家能力有限，明白專心啲做好一個部門嘅事情好過，香港同內地有好多好演員，真係做到導演時，不如搵啲可以全心全意喺角色上發揮嘅人，我唔使乜嘢都做晒嘅，專心做好導演工作。」最近唱埋劇集插曲《Lost in the Night》，她希望向全能藝人方面發展，朝着張艾嘉和吳君如等方向進發，「知道好作品會影響好多人嘅人生，都抱住呢個初心去工作，相信成功嘅電影工作者，貢獻嘅心都好強，唔知自己有冇呢個能力，但希望通過努力可以帶到一啲好改變畀觀眾，就好開心嘞！」

蔡潔有個導演夢，仲要自編自導。

蔡潔有個導演夢，仲要自編自導。