《男航女機師》SLDPK丨頭條戲場

全片110分鐘，笑咗90分鐘，當中包含小笑、大笑、翻笑同埋笑到係咁拍朋友隻手，香港好多導演都話拍笑片好難，但韓國啲笑片真係好癲，好笑之餘，笑料仲要好高質，點做到？此片內容有關男人扮女人，易容玩足電影八成時間，即係咁，如果你覺得男扮女點可能呃到人?又或者睇親戲都邏輯L上身，呢套戲未必啱你睇嘞。(剛上映) 撰文:廖思慧

韓正優扮女人考機師獲取錄，首日返工超有自信。

韓正優本是星級機長，有錢又有面，但衰多口被炒後一沉百踩。

電影屬大癲級爆笑喜劇，由搞笑好叻的曹政奭主演，一直知佢勁，劇集、電影、舞台劇、音樂劇，唱埋OST之餘，仲要有獎攞，真係瓣瓣掂。戲中飾演韓正優，本是深受市民追捧的明星機長，電影以他的受訪片段作故事開首，然後因為衰多口由天堂跌落地獄，事業愛情兩失意，衰開有條路，雙失中佬更慘被航空界列入黑名單，身邊的擦鞋仔全部走晒，更風水輪流轉，要做「契弟」求幫忙，喜劇難得含警世意味。

老婆嗌離婚，工又冇埋，好彩韓正優仲有個仔。

收到成堆繳費通知書，韓正優把心一橫扮女搵食。

韓正優個妹，韓正美真身，都係癲嘅，韓善伙做白卡妹真係一流。

唔好買嘢食入場
為了再揸飛機，韓正優決定富貴險中求，請求美妝KOL細妹韓正美(韓善伙飾)幫手，化靚妝兼裝假胸再著返對高踭鞋，然後冒充妹妹應徵機師竟順利獲取錄，笑到黐線癲狂劇情就此展開，期間有大量危險位，會好驚「A貨韓正美」因大意而穿煲，全程Keep住又驚險又好笑，買咗爆谷入場應該食唔到，要留意返。

「A貨韓正美」著花裙仔出街，獲叫靚女超興奮。

「A貨韓正美」開工要扮聲又要舉止斯文，經常徘徊穿煲之間，好好笑。

「A貨韓正美」越做越受歡迎，步真身後塵做埋星級機師拍廣告。

為了減輕佬味，曹政奭拍攝前努力減去15磅，加上天生有對纖瘦靚腿，著短裙真心好睇，狗公同事徐賢錫(申承浩飾)睇到發晒光，更因男扮女初期未熟習著裙禮儀而鬧出好多笑話，狗公同事更誤以為「A貨韓正美」嘅所有大意走光都係刻意引誘佢，哈哈哈哈哈。最後要讚翻譯，字幕抵死又貼地，有「脆」、「提子」及「大癲」等，同劇情勁夾，睇得好開心。

阿妹同阿哥嘅互動有好多地獄笑位。

「A貨韓正美」嘅狗公同事徐賢錫，亦曾是韓正優的擦鞋仔。

「A貨韓正美」嘅閨密尹瑟琪(李宙明飾)，同韓正優亦有過節。