蔡繼光海選搵到有張國榮Feel新人 《喝采》導演執導舞台劇講大學生故事丨獨家

去年尾，執導電影《喝采》4K數碼修復版的蔡繼光導演，已透露將首度編劇及執導舞台劇。下月公演的《柏克萊的日子》以他大學時期的經歷為藍本，正跟演員忙綵排的他透露製作舞台劇跟電影分別很大，遇上不少困難，特別是搵演員，最終透過海選搵到有陳百強和張國榮影子的蔡子軒任男主角。採訪：杜杜 攝影：林賓尼

蔡導身兼《柏克萊》的導演及編劇，他認為製作舞台劇跟電影很大分別。

去年蔡導出席《喝采》4K數碼修復版慈善首映禮，跟翁靜晶喜相逢。

年屆77歲的蔡導創作戲劇多年，但從未試過講自己故事，回想在美國柏克萊大學讀書時，曾有不一樣的經歷，「77歲，係時候面對返自己，講吓過去作總結，大學生活係人生最重要時候，亦係最快樂日子，我想搵返嗰段快樂，亦有好多甜酸苦辣，我哋發動過保衛釣魚台嘅學生運動，全美國一齊響應，甚至香港、台灣、歐洲同南美洲都有好多華人學生參加，值得講返呢個故仔畀大家聽。」

舞台劇《柏克萊的日子》將於下月公演。

蔡導跟（左起）樂悠悠、蔡子軒、羅頌欣、譚偉權、麥紫筠和羅卓菲近日忙於綵排。

劇中譚偉權、羅頌欣和麥紫筠飾演一家三口。

破傳統以四面台呈現

由於這個題材製作龐大，蔡導搵電影投資者及演員皆遇上困難，「我唔熟話劇界，唔知邊個演員演得好，最弊佢哋做到攞獎，因為冇得錄影，我睇唔返佢哋演出，唯有做海選，新舊演員有成幾百人嚟。」而男主角「戈夫」原型除了蔡導本人，還集合幾個人物，亦順利在海選中搵到蔡子軒演出，「佢啱啱大學畢業，同角色年紀相似，又受過演戲訓練，外形及對夢想嘅追求，跟當年《喝采》時陳百強、張國榮都幾似，我同佢講做話劇唔係好多錢，佢話最緊要攞經驗，仲話搵到錢想去進修，唔係想搵好多錢做大明星，同佢有合作空間。」

蔡導跟（後排左起）蔡子軒、羅頌欣、譚偉權、麥紫筠、樂悠悠（前左）和羅卓菲（前右）近日忙於綵排。

劇中譚偉權、羅頌欣和麥紫筠飾演一家三口。

蔡子軒興奮被蔡導選中，被讚似陳百強和張國榮受寵若驚。

當日綵排見子軒表現自然，剛在浸會大學環球螢幕演技藝術系畢業的他，已有不少演出經驗，不過首次擔正直言壓力大，而獲蔡導大讚令他更驚青，「導演言重，拉埋我同張國榮先生、陳百強先生講，實在係好大讚賞，希望可以努力做到佢哋咁出色嘅表現啦！」而蔡導今次更打破傳統，以四面台形式呈現，「四面台會幾好玩，比較生活化啲，我想演員同觀眾多啲互動，譬如學生運動派傳單會派畀觀眾，對演員亦多啲挑戰性。」

蔡子軒跟樂悠悠和羅卓菲，正排練70年代在美國發起的學生運動。

1980年，蔡導執導陳百強和張國榮主演的電影《喝采》。