男子組合OneUp處男作出賣「沉船」情史 《造星V》敗將唔識死Rap入樂壇丨獨家
2024-08-12 07:00 
新晉男子組合OneUp由出身《全民造星V》的25歲中英混血兒賀邦（Bronny）及24歲中葡芬混血兒方智弘（Oscar）組成，處男作《Ten Outta Ten》講「沉船」式戀愛，兩人均有「沉船」經歷，試過追女同學追足一年。採訪：杜杜 形象:Eddy Chu 髮型:Franco Chung@Leonardo 3 Hair Corner 化妝:hongjai_ makeup 場地:Amelia Hong Kong@Harbour City
Bronny及Oscar在《造星V》第一輪已Bye Bye，但兩人沒有放棄夢想，反而更堅定以歌手為目標，由於經常孖住接Model Job，兩人越來越老友。Oscar先簽公司，再預埋Bronny，「經理人見到我同Bronny拍廣告好合拍，問我哋係咪一對？好搞笑！然後覺得我唱佢Rap做組合效果會唔錯，初時都擔心資源問題，但同Bronny傾反而佢叫我諗清楚，佢入咗嚟會令件事昇華定係會分薄咗，佢咁講我就放心嘞！」Bronny收到Oscar電話好開心，兩人夠老友，任何事都可以攤開講，「OneUp喺打機嚟講係多咗條命，《造星V》完咗我好似冇咗條命，Oscar呢個電話好似過咗半條命畀我。」
Bronny愛妹妹Oscar冧姐姐
咪以為混血靚仔係萬人迷，兩人拍拖次數不多，追女仔亦要好努力，Oscar說：「新歌就係講我哋戀愛態度，以為我哋好有自信，其實只係沉你呢隻船。」內容亦好似Oscar初戀，「中一第1日返學就對坐隔離嘅女同學一見鍾情，追到中二先拍拖，拍到畢業升唔同大學，就慢慢疏遠。」初戀發生於中四的Bronny，追女同學追足1年先成功，舊愛亦是同類型，「鍾意啲cute，妹妹啲嘅女仔。我女神係陳穎欣（Yanny），仲入咗佢fans club，參加簽書會同握手會。」Oscar嘅女神類型就經常變，「近期鍾意姐姐，《造星IV》師姐雲浩影呢類型都唔錯。」
最新回應