31歲許靖韻被舊愛精神虐待 死過翻生 遇恐怖情人搞到大學畢唔到業丨獨家

31歲許靖韻（Angela）早前推出新歌《被吃掉的靈魂》，講愛上一個人之後如着魔般行屍走肉，她唱得份外投入，皆因10年前讀大學時曾有類似經歷，拍拖拍到成日喊，更為恐怖舊愛搞到眾叛親離，性格突變，甚至有自毀傾向。因為受過「重創」學精咗，Angela學識愛自己多啲，以後就算拍拖都唔會再「沉船」。 採訪：杜杜 攝影：林賓尼 場地：Marco Polo\'s Prince Hotel SAVVY

單身的Angela，完全唔心急拍拖，專心事業。

單身的Angela，完全唔心急拍拖，專心事業。

Angela講起痛苦拍拖經歷已變得輕鬆，證明已完全復原。

Angela以往喜惡是0到100沒中間位，現在要學識搵到50。

Angela以往喜惡是0到100沒中間位，現在要學識搵到50。

新歌《被吃掉》跟2017年《被討厭的勇氣》同樣出自林若寧手筆，但內容完全相反，「收到歌詞都幾驚喜，個名寫住《Did walking dead》，係極度負面同絕望，幾乎放棄狀態，之前都有好多慘情歌，但咁絕望都係第1次，首歌好似𠵱家成日講嘅口頭禪『真係好想死』，一個人失戀或俾工作折磨到好似被吃掉靈魂。」

Angela認為「着魔之戀」對演戲有幫助，「如果未感受過，唔明啲人情緒點解去到咁誇張。」

MV中，Angela演繹行屍走肉狀態零難度。

家人朋友反對都唔理

Angela演繹新歌完全冇難度，因10年前已入行的她曾經歷嚴重情傷，「『小背心』前1、2年，經歷咗1段被吃掉的靈魂，所有嘢都好差，首先我讀緊BU（浸會大學），成績差到畢唔到業，好大原因係感情狀況太差，個個都叫我分手，叫我唔好再咁落去！行屍走肉狀態，咩都唔想做，書都冇心機讀，總之情緒影響得好緊要。」她形容當時好似着了魔，「嗰時19、20歲，覺得拍拖好痛苦，成日都喊，我唔知佢渣唔渣，但個個朋友都覺得佢對我唔好囉！連好朋友都叫我唔好一齊，我都冇聽，唔知自己做乜，好奇怪，最尾嗰年連朋友都唔見，屋企人又好少見，就算家人反對都要繼續一齊，有種眾叛親離感覺。」

Angela跟舊愛分手後，最終在浸大順利畢業。

Angela為舊愛，搞到爭啲冇哂朋友。

身邊人齊聲反對，全因Angela跟男方經常鬧交，「佢好似女仔咁，每次鬧交都係我𠱁佢，我係要叫佢唔好嬲啦！朋友會覺得你做咩事呀？！好似𠵱家成日講PUA（Pick-Up Artist），我係精神虐待緊自己，唔知對方釋放咗咩，令我覺得淨係可以同佢一齊，冇咗靈魂，連我細妹都話嗰時唔想同我講嘢。」情況最差時，她曾經有輕生念頭，「覺得所有嘢都唔好，朋友唔想理我，冇晒朋友，痛苦1年糾纏1年，total 2年。」

Angela本來跟家人關係很好，為舊愛差點反面。

Angela行屍走肉的日子，連妹妹都不想睬她。

學識愛自己拒再「沉船」

問到前度是否條件很好才令她着迷？Angela搞笑說：「屋企人都有咁嘅疑問，哈哈！」她稱男方除了靚仔，還很有才華，「佢大我幾年，都係識音樂，開頭所有嘢都覺得美好，所以一去到唔美好，就覺得好大反差，接受唔到，會諗好多嘢。」捱了2年，有日她突然醒覺決定分手，「有晚朋友問我出唔出去跑步？我話好喎！想出去做運動，想見返啲朋友，嗰晚好開心，就好決絕斬纜，咁耐以嚟都係我去求佢一齊，嗰時一決定，要斷就斷咗。」她回想亦覺得當時的自己很陌生，「同我性格完全唔同，係另一個人，真係冇咗自己。」之後她還寫歌《事與願違》記錄這次經歷。

朋友邀Angela跑步，令她覺悟狠狠踢走恐怖舊愛。

Angela寫了歌曲《事與願違》記錄這次經歷。

Angela自揭痛苦瘡疤，用心良苦，「可能好多人經歷過或經歷緊，希望首歌話畀佢哋聽，可以走出嚟。」飛甩恐怖情人後，她再拍拖也學識愛自己多啲。2018年，她跟《全民造星》的「表弟」容穎賢拍拖，因長期分隔兩地於2021年分手，非常理性。「曾經試過好痛苦，唔會再咁，當然會有熱戀期，但唔會為咗佢影響跟身邊人關係，放棄所有嘢。我鍾意風平浪靜，我好多嘢要處理，如果仲要處理埋感情，不如唔好拍拖，哈哈！」

容穎賢先後參加過《全民造星》和《全民造星II》。

容穎賢先後參加過《全民造星》和《全民造星II》。