JNYBeatz興奮6歲囝囝識Rap又識彈琴 20出頭做老竇為養家瘋狂教學生搵錢丨獨家

2024-08-09 08:00

31歲的JNYBeatz（楊駿）接受網台主持人床哥（陳鈺麟）訪問，發覺兩人都好後生就做老竇，又試過沉迷打機，就合作推出歌曲《毒男爸爸》，MV搵埋兩人仔女客串。講到24歲就有下一代，JNY坦言為養家要瘋狂教學生搵錢。採訪：杜杜

JNY細個學鋼琴，之後又學埋打鼓和結他，教學生搵錢都多幾瓣。

JNY感激太太支持他做音樂，「佢話欣賞我有才華。」

《毒男爸爸》源於JNY接受床哥訪問，「講起大家都係同年，又係好後生做老竇，我24歲，佢22歲，大家原本又係好毒咁沉迷打機。」兩人感同身受，於是就有齊寫歌念頭，「分享由做毒男去到結婚做爸爸嘅經歷，原來做咗爸爸諗法會唔同，有份責任心。」兩人拍MV最開心重現毒男日子，又可同子女留個紀念，「我哋喺網吧拍，有1粒鐘畀我哋打機，又加咗我哋湊小朋友嘅片落去，好有紀念價值。」

新歌分享JNY跟床哥由毒男變老竇經歷。

JNY好耐冇打機，開心拍MV在網吧取景。

仔女遺傳音樂天份

講起跟從事設計工作的太太結婚，JNY本計劃待30歲後經濟穩定才生BB，所以大仔突然出現令他不知所措，「本來同屋企人住，但生小朋友搬出去住，嗰時1個月搵幾千蚊，都真係幾驚㗎！」不用工作便打機的他，變得積極搵奶粉錢擔起頭家，「喺音樂中心教學生，最癲試過1星期做足7日，每日8個鐘，又會私人教學生同幫人寫歌，有時連婚禮琴手都撈埋，好彩全部同音樂有關，但係自己寫歌嘅精神同時間就冇晒。」

JNY一對仔女和床哥的8歲囡囡都有份客串MV。

JNY親子活動就是玩音樂。

JNY去年成立音樂學校，親自教授音樂製作。

JNY有教6歲囝囝Jairuz和3歲囡囡Jayla彈琴和結他，全因仔女有興趣學，「我細個學琴到考5級，好密咁練都會好辛苦，我想佢哋開心咁玩音樂。」最感恩仔女都遺傳了他的音樂細胞，「大仔成日聽見我話去錄音，佢有個電子琴可以錄音，每朝就會自己錄啲歌，再同我講『爹哋你聽吓，我都識錄音㗎』，真係似樣嘅，佢最勁係自己哼咗啲音，可以彈返出嚟。」他已開始跟仔女一齊創作，「個仔鍾意Rap多啲，阿女就鍾意唱歌，有同佢哋一齊寫歌做Demo，睇吓第時會唔會賣到畀人，哈哈！」