專欄│車路士又想逼走自家青訓？

今夏車路士繼續清走自家青訓，再購入有潛質成為明星嘅球員，已經清咗伊恩馬迪臣、利維斯賀爾同奧馬利赫捷臣，集訓初期仲要將杜利奧查洛巴燉冬菇，冇得一齊去美國集訓，而家又輪到干拿加歷查。

雖然上季加歷查表現出色，但球會自1月冬季轉會窗已經想將佢清走，原因都係財政要達致收支平衡，亦都為未來買球員作準備。球會其實同佢一路傾緊合約，但係彼此都冇共識，近期傳聞嘅一份約係2+1，但係對比安素費南迪斯或摩西斯卡些度等等新簽返嚟嘅中場球員全部都係5年約起跳明顯太短，所以一路都未落實，前排更加傳出馬體會打算用4,000萬歐羅收購，不過加歷查本人一路都未決定轉會定係留隊，原因好簡單，佢愛車路士。

在情在理上，加歷查都值得更加好待遇，應該要轉會，而馬利斯卡嘅回應都係避重就輕，冇就呢件事正面回應。其實以往車路士清走年輕球員都係習以為常，以往嘅穆罕默德沙拿同奇雲迪布尼就係例子，有錢就可以賣走，但往往都可以用成績掩蓋。今次加歷查係上季隊中好重要，甚至最出色嘅球員，今次嘅逼宮連埋查洛巴事件，就顯得有少少難睇。

不論加歷查最尾留低定走，佢都係好努力同埋愛呢間球會嘅人，真係少之有少，即管睇吓嚟緊發展點，Stay Or Leave？Willhappy