「Ada姐」嚇親唔敢再跟舊同學姜濤聯絡 女團VIVA口密拒講情史Carina鍾意黐女仔丨獨家
2024-08-02 07:00 
英皇新女團VIVA，由《全民造星IV》參賽者姜咏鑫（Ada）、李晞彤（Carina），《就是青春》亞軍張鈊貽（ValC）及來自順德的馬思惠（Macy）組成。 第2首派台歌《DTR》講女追男，問到情史，4女都非常口密，而曾跟姜濤傳緋聞的Ada，再次釐清兩人關係。採訪：杜杜 攝影：朱偉彥 形象: Constance Lee、Peli Lam、Kary Leung@Constyle髮型:Ritz Lam、Jeremy Wong、Kelvin Liu、Taka Chung、Hiro Chow@myos_hair 化妝:Cyrus Lee Makeup Team、Irene Hung、Davina Cheung 場地:Studio Meta
繼出道作《Topic Killa》後，VIVA再推出同樣由韓國班底製作的派台歌《DTR》，講女仔主動出擊，霸氣地去「Define the Relationship」（確定關係）。問到有冇試過女追男？Carina代隊友表示並非她們作風，「我哋之前拍拖都屬於觀察型，多過主動出擊型，亦偏向長情同認真對待感情。」
唔會主動追男仔
Macy首先交待情史，「我唔覺得戀愛好重要，又比較早入行，戀愛經驗應該係冇。（即係冇拍過拖？）唔係冇拍過拖，可能有曖昧，唔係戀愛囉！冇認真計過幾次，就算有段關係都唔覺得自己拍緊拖。」講到女追男更加覺得冇可能，「我係非常之被動嘅人，好似今日比較少講嘢。」
拍過2次拖的Carina，自覺同性緣較異性緣好，「自細讀女校，對女仔好主動，會主動去認識，但唔係好識同男仔打開話匣子，比較怕醜啲，同場有異性，我會偏向黐住女仔，唔敢主動出擊。」以私隱為由唔肯公開情史的ValC，自認性格比較主動，「見到好想識嘅人，無論男女都會主動做朋友，了解對方，但唔會話想同佢拍拖而想識佢。」
自認長情的Ada，拍拖次數不多，對上1次長達8年，同樣被動的她，未試過做主動，「無論愛情、朋友、工作都好，比較被動，生活嘅嘢我未必會主動同佢哋（VIVA）講，說話比較少，唔會主動同人講對佢有意。」講到參加《造星IV》時，跟同學仔姜濤因網上互動而傳出緋聞，她對此感到無奈，「其實都係同學關係，真係唔存在緋聞，當時比賽先互相鼓勵。」她承認之後跟姜濤冇任何接觸，「大家都覺得距離要拉返遠啲，因為咁冇再聯絡？！」
隊員負責寫Rap
《造星IV》60強止步的Carina，IG有5萬followers，屬隊中人氣王，多過VIVA官方IG follower，她表示全靠《造星》，「由2、3千去到20k，多謝嗰時嘅自己有勇氣去玩比賽。」她亦想到方法幫隊友增加人氣，「𠵱家IG可以一齊出po，見到隻舞幾好睇喎，會叫佢哋一齊拍片。」
ValC前年奪得《就是青春》亞軍後，接受本報訪問時表示想向創作歌手發展，更視中學師兄湯令山為奮鬥目標，以女團姿態出道的她，目標依然未變，「新歌《DTR》Rap都係自己寫，好似向嗰個方向行緊，學緊點寫好曲同詞。」曾任舞蹈員的她，亦期望將來幫手為團隊編舞，「好多嘢都好想做，但實行要同公司繼續傾，做咗dancer得2、3年，年資唔係太高，想搵個有經驗嘅人一齊做，會完整啲，」
2019年Macy參加內地《花物女孩大賞》奪得「年度花物女孩」，因而簽約英皇，是最早加入公司的成員。2020年參加騰訊視頻女團選拔節目《創造營2020》並取得第24名，同年推出個人單曲《一時一樣》。她認為女團更適合個人發展，又開心可以來港工作，「我住喺順德其實好近，同埋以前都會嚟香港玩，唔會覺得離鄉別井，同埋由細到大都睇TVB，接觸香港文化，同媽咪一齊睇《超級無敵獎門人》係童年回憶。」
最新回應