ROVER四子各有不快往事想推倒重來 努力進步寫好歌回報公司力捧丨獨家

樂隊ROVER推出第2首單曲《回魂術》，除繼續親自作曲，還首次挑戰編曲，向全能樂隊進發。《回魂術》以欺凌為主題，亦有修補被破壞過去意思，而四子則自揭各有想推倒重來的不快往事。他們又坦認感受到被公司力捧，會努力進步及寫好歌回報公司寵愛。採訪：杜杜 攝影：孔子 形象:SK@issyynkeem 髮型:kit li化妝:左玉婷、sharonlee_makeup 服飾:MR PORTER、DEOPUZ 場地:No.1 Party [email protected]

ROVER認為報答公司最好方法，就是做好自己做出成績，努力創作更多好歌。

四子提到若有機會可以推倒重來，都表現得好興奮。

相對於出道作《秒速8公里》，ROVER創作《回魂術》速度更快，Jason說：「嗰晚睇完TRASH 喺《春浪》騷表演，跟住Kim話『不如去寫歌囉』，結果一寫就寫到朝早，雖然我哋第2日有Job，但靈感啲嘢一嚟就要寫，唔係就冇。」四子興奮透露首歌在他們首個Band房「出世」，不過當時未裝修好，要坐地下寫歌，Jason說：「有啲煎熬，我哋食完嘢都幾晏，大家好熱血沸騰咁話要返去寫歌，但係寫歌唔係話寫就寫，嗰晚只係諗咗首歌嘅初形。」希晉說：「嗰晚同時間寫緊另一首歌，想有得揀，我哋都拗到癲，個腦真係糾結到爆，又諗主題、曲風，亨仔先會扻頭埋牆。」亨仔說：「因為諗唔到揀邊首先。」

ROVER見完偶像台灣隊團TRASH，即有靈感創作《回魂術》。

ROVER親自為Band房裝修，砌鼓當然由Jason動手。

公司為ROVER買了大量新樂器。

Jason望順利大學畢業

四子這次首次挑戰編曲，原來早在《秒速》時他們已試編了一部份，今次決定膽粗粗向監製Edward Chan提議全首歌做，希晉說：「希望呢首歌騷到我哋型外，想有我哋多啲諗法喺裏面，當然Eward老師都有畀意見，但今次想放手畀多啲我哋做。」Jason認為作為樂隊，向這方向走是必須，「無論曲詞又好，編曲又好，需要多啲我哋元素喺入面，會更真實屬於我哋。」但填詞方面他們仍未有信心，相信暫時都要假手於人，Jason說：「始終我哋揸筆嘅經驗唔多，寫吓demo仔都有，但係要寫到一份好成熟、好中嘅詞，需要多啲時間練習，今次搵咗梁栢堅老師幫我哋寫呢份詞。」

ROVER新歌《回魂術》MV，趁到台灣拍《團魂修煉》時一齊拍。

ROVER感激監製Edward鼓勵他們為《回魂術》編曲。

《回魂術》以欺凌為主題，但亦有修補被破壞過去的意思。若然四子有機會將過去推倒重來，他們又會想改變那一些不快經歷？Jason主動舉手講，「老實講我唔係好鍾意讀書嘅人，鍾意落手做比較活潑啲，所以揀讀Fashion Design，但自己比較懶功課未交得足，因有好多工序比較複雜，有機會想努力多啲讀書，咁我應該畢咗業。」工作同學業兩邊兼顧的他，本來今年大學畢業，但要延至明年。希晉就想重拾童真，「以往覺得有好多時間，轉眼今年25歲，好想返18、19歲嗰時，最冇煩惱、冇壓力嘅時候，可以多啲時間玩，好彩𠵱家入到ROVER，搵返個目標繼續前進，同兄弟一齊去闖。」

Jason希望努力完成大學課程。

Jason希望努力完成大學課程。

希晉想重拾18、19歲的童真。

希晉想重拾18、19歲的童真。

Kim想愛貓起死回生

亨仔就想改變16、17歲時的心態，「𠵱家對唱歌有啲信心，希望嗰時已經係咁有信心，如果我早啲開始，就唔會嘥咁多時間，咁遲先開始音樂事業，自己好想喺嗰時就開始努力，𠵱家好彩識咗ROVER佢哋。」Kim最希望有起死回生能力，可以見返到幾年前急病過世的愛貓德德，「嗰時咁啱唔喺屋企，見唔到佢最後一面，想見到佢最後一面先送佢走。」最神奇是德德的死忌，他都彷彿看到牠「回魂」，「試過有年見到好大隻飛蛾黐咗喺度，後尾我阿媽就話嗰日就係貓貓死忌，近排我返屋企出𨋢，又係嗰個日子有咁大隻飛蛾，諗起就好想有起死回生能力。」

亨仔渴望改變16、17歲時的心態。

亨仔渴望改變16、17歲時的心態。

Kim最想見到愛貓最後一面。

Kim最想見到愛貓最後一面。

ROVER出道被受公司力捧，拍團綜《ROVER團魂修煉》，租私家Band房又買樂器，開告別九展騷，更獲安排唱奧運主題曲兼任開幕式表演嘉賓。四子感受到得寵的滋味，Jason笑謂：「簡直係開心得像個孩子。」為此他們會更加努力報答公司，亨仔說：「出多啲歌，唔可以辜負對我哋嘅期望。」希晉就希望學好樂器，「希望結他快啲進步神速，可以彈到亨仔咁勁。」Jason認為做好自己最緊要，「我會盡力同大家配合，做多啲好歌，做快啲再完整啲。」Kim好認同，「我覺得報答公司短期內都係唔好遲到，哈哈！我講自己！」

ROVER與KC&Tsoul為公司唱奧運主題曲《星塵遠征軍》。

早前ROVER舉行《ROVER 告別九展音樂會》免費騷。