專欄│德國出局拿格斯文功大於過

2024-07-07 07:00

德國8強對大熱冠軍西班牙可以話係冠軍前哨戰，賽前很多人會評論富克洛還是夏維斯正選，望到個正選陣容後，又會質疑利萊辛尼與安利簡恩取代咗安特列治及科利安華迪斯嘅正選，令人覺得拿格斯文呢場正選名單係咪擺錯人？

我賽前都係同大家一樣諗法，但事後睇返呢場波，其實望見富克洛做串連的確係有難度，尤其是佢傳波走位同球員唔係好夾，經常會有誤會，雖然佢善頂善射，而夏維斯擁有推前10碼嘅能力，幫手做串連的確係更加適合。

而辛尼真係認真踢波，幾令我估唔到，有一球明明甘美治喺右邊邊線傳唔到位，但佢竟然全速落返嚟接應球波仲要交到出去，再加上華迪斯其實入波之前出嚟嘅狀態都係麻麻哋，即使入咗波之後，去到加時都有一球反擊可以交橫但係兜兜轉轉，結果橫傳畀富克洛射斜。安特列治染咗個頭髮，但係失波就絕對關佢事，丹尼爾奧莫後上入楔，正正就係佢冇去貼身看管，令到德國落後。

完場後再回顧返，其實德國在拿格斯文上任之後，短時間內搵返卻奧斯，真係算係咁，呢場波要話成也卻奧斯敗也卻奧斯，中場覆蓋範圍的確唔夠，不過無論如何，拿格Sir短時間內準備齊晒Plan A同Plan B，即使德國隊出局但有如此好表現，佢仍然係功不可沒。Willhappy

關鍵字