雲浩影衰無膽錯過入行好時機極後悔 釗峰 Hillary Elsie輪住講遺憾乜都聽人講丨獨家
2024-07-02 07:00 
商台主辦、DJ Elsie（呂珮琳）創作並跟梁釗峰、劉沛蘅（Hillary）和雲浩影（Cloud）主演，以遺憾做主題的903舞台劇《遺憾收藏館》，將於9月上演。4位主角輪流講工作上的憾事，前三者會過份在意別人目光，而Cloud就後悔因想太多，錯過入行最佳時機。採訪：杜杜 攝影：譚志光 形象:Matthew(Elsie)、Matthew Chan(Cloud)髮型:Seiko@Hair Culture(Hillary)、Wing Wong@The Attic(Cloud)、 Zanki Ng@BHC(釗峰)化妝: Zoe Fan(Hillary)、Kineks Ho(Cloud)、Karen Ma(釗峰)服飾:As Know As Pinky、Dazzlin、BVLGARI(Elsie)、Isabel Marant(Hillary)、Harvey Nichols(釗峰)
Elsie初入商台就單拖主持周日深宵節目《艾爾絲懷疑仙境》，當時監製謝茜嘉提醒她，想有突出表現就要下點苦功，「節目喺凌晨1點至2點，應該冇人聽，嘉姐話『你去寫廣播劇啦！啲人會覺得呢條友好勤力，凌晨都有廣播劇出，落多啲功夫去做，終有日人哋會睇到』。」她想到大部份人對遺憾都會有共鳴，就創作了《遺憾收藏館》，去年更膽粗粗向商台CEO陳靜嫻自薦變成舞台劇，但她對自己創作完全冇信心，提議將跟阿正（黃正宜）主持的節目《Bad Girl佬》變成舞台劇都冇問題，「我淨係想寫舞台劇，真係冇所謂。」不過CEO反而鼓勵她：「既然做就做返你節目個《遺憾收藏館》，搬大佢啦！」
Elsie逼自己太緊
提到生活上的遺憾，Elsie說：「可能我哋4個都係好樂觀嘅人，活咗咁耐，一定有啲嘢唔開心，但冇睇成遺憾。」Cloud就補充，「Elsie將遺憾嘅定義set得好窄，鬆返少少我哋應該有好多。」講到工作中的遺憾，自言缺乏自信的Elsie，認為自己太在意別人眼光，「出去做一間公司，對嘅係上司、老闆，服侍得佢好好，你嘅工作就冇乜嘢，但做幕前，我嘅客就係全港嘅人，對我嚟講係好難，另一樣遺憾就係逼得自己太緊，1千個意見都會聽晒，擺晒入自己個腦，好辛苦，點樣可以睇自己多啲，多過人哋，呢生都要學習。」
釗峰被Wyman嚇親
釗鋒相當認同Elsie，「我哋對別人嘅聲音特別敏感，對自己聲音特別遲鈍，唔係人哋就係啱，呢個係要終身學習。」因為2012年 C AllStar首個大型演唱會，一個特別觀眾令他發現自己有問題，「原來阿Y（黃偉文）睇我哋個騷，佢好sharp，眾裹都尋到佢，唱歌要呼吸，但我唔係好呼吸到，好緊張，尤其啲歌係佢嘅作品，我唔知佢嚟，就嚇一嚇。」之後他表現不及首場，就知道自己好在意別人看法，「尤其是大前輩，呢個動作或唱法，人哋會點睇呢？放到核彈咁大，其後好啲，從錯誤裏吸收，𠵱家都會顧別人，但不斷提醒呢個係我畢生功課，要錫自己。」
Hillary冇咗自己
Hillary同樣太在意外界聲音，為了迎合別人失去自我，「覺得觀眾鍾意睇我呢一面，就騷呢面畀人哋，但嗰個未必係真正嘅我。」她坦認最初拍《膠戰》時，知道觀眾喜歡看她笑，就刻意笑多啲，「平時都鍾意笑，但會放大咗呢樣嘢，拍拍吓覺得唔work，因為刻意去呈現會攰，拍耐咗跟隊友熟絡咗，覺得做返自己會長久啲，反而俾人見到自己更加多面向。」她最遺憾就是發現得太遲，「出道都唔短時間，初初真係唔係自己。」所以接到舞台劇的「小三」角色便一口答應。
Cloud後悔想太多
Cloud的遺憾就是想得太多，錯過入行最佳時機，「我好多訪問都死唔認輸，話自己需要時間學習，如果當初勇敢少少，諗自己多少少，仲後生應該更有資本去諗自己想做乜嘢，反而喺我最應該大膽嘅時候最膽怯，呢個係我嘅遺憾，會睇唔起自己當初唔夠膽為自己爭取想做嘅嘢。」她有此想法，全因入行後發覺自己有很大變化，「入咗行每日發現自己學得好快，學到好多嘢，完全想像唔到我早1年入行，𠵱家嘅我會係點呢？！」釗峰搞笑搭嘴：「可能成為咗我嘅前輩，哈哈！」Cloud坦認這次後悔經驗，提醒自己將來要更勇敢去行，「勇敢試嘅同時，都發現有時聽唔到自己想要乜，feel到想咁樣喎，但我會撳低佢，係咪應該要聽其他人意見，有好多天使同魔鬼嘅聲音。」
最新回應