專欄｜上《猜波台》直播陪讀者睇好波

2024-06-17 07:00

各位讀者好，小妹Vicki已經離開電視台有一段日子，好開心喺歐國盃賽期可以轉條跑道，喺《星島》平台再同大家見面，嚟緊禮拜二土耳其對格魯吉亞同禮拜四斯洛文尼亞對塞爾維亞呢兩場比賽，我都會現身Youtube《猜波台》直播，大家記得支持收睇啊！

分組賽第一輪當中，小妹嘅焦點係今晚E組比利時對斯洛伐克。雖然比利時嘅黃金一代逐漸褪色，但自從泰迪斯高執起教鞭後，用兵、排陣都有新景象，對陣實力較弱嘅隊伍往往能夠零封取勝。而斯洛伐克鋒線唔夠銳利，後防亦未見穩健，近期面對強隊都係輸波而回，今場對住攻力強勁嘅比利時，睇怕都係凶多吉少，讓球讓一球/球半，「主勝」可取。

另外，當然唔少得我愛隊西班牙大戰衛冕嘅意大利啦，呢場波周五凌晨就有得睇嘞！

西班牙首輪對住克羅地亞，原本以為係硬仗一場，但上半場已經狂風掃落葉鎖定3:0勝局，表現對辦。相反意大利首輪對魚腩阿爾巴尼亞，早早喺23秒就意外失波，雖然最終「反吸」贏波，但整體表現較西班牙失色。今輪兩隊正面交鋒，相信我愛隊西班牙能夠全取3分，提早出線16強。Vicki趙小姐

-----

由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊 https://bit.ly/4csd4qL

緊貼最新最快新聞資訊，請立即下載星島頭條App：https://bit.ly/3Q29Vow