張偉文暫離老人院開心又食又和唱方俊麗莎開酒樓騷狂收「大牛」丨獨家

2024-06-14 08:00

72歲「靚聲王」張偉文9年前受腰患、糖尿病及腳痛困擾需以輪椅代步，長住老人院冇乜「細藝」，全靠徒弟方俊帶他周圍去。上周五端午節前夕，方俊和「新加坡歌后」麗莎在元朗一間酒樓登台，張偉文都係席上客，難得離開老人院出去鬆一鬆，張偉文笑晒口全晚食唔停，仲跟住台上方俊係咁唱，好有歌癮喎。採訪：方騫平

張偉文睇得好投入係咁跟住唱。

方俊、王美蘭、方麗盈成日𠱁到張偉文笑騎騎。

環星娛樂老闆張國林跟心情大靚的張偉文合照。

方俊落台和偉文打招呼。

偉文有好多FANS。

偉文成為「打卡熱點」。

自從方俊進軍歌壇後，張偉文的忠粉都會支持佢，加埋麗莎fans，當晚場面熱鬧，方俊及麗莎共唱咗30幾首歌，包括《H2O》、《輪流轉》、《相思淚》及《訪英台》等，張偉文就係咁跟住唱，而fans揮動螢光捧，甚至興奮行離個位跳舞及到台前送利是，有啲仲畀「大牛」($500)。

方俊和麗莎於酒樓登台。

方俊FANS揮晒螢光捧。

方俊載歌載舞唱《H2O》。

王美蘭係表演嘉賓。

方俊、新加坡歌后麗莎落力演出。

同方麗盈好合拍。

麗莎久休復出寶刀未老。

FANS大派利是。

麗莎大豐收。

方俊唱到落台。

方俊都有唔少利是。

方俊麗莎收到好多利是，包括有「大牛」現金。

幫麗莎賺多啲「水腳」

不過，原來方俊只係「陪太子讀書」，他將歌酬送晒畀麗莎：「近年病癒嘅麗莎要照顧孫女，雖然久休復出，但5年來都冇收入，之前留港3個月只係喺文化中心開咗一場演唱會，我想佢返新加坡前可以賺多啲水腳，所以先有呢次演出。」除此之外，當晚方俊還請埋一班老人家及照顧者參與：「近日接連發生照顧者輕生嘅悲劇，長年照顧病患者真係有好大壓力，希望出少少棉力，可以幫到佢地紓壓。」