55歲伍詠薇被勒令增磅慘呻：真係食極唔肥蔡一傑一句激勵𢱑撈成功簽英皇丨獨家

2024-06-03 07:00

入行35年，55歲伍詠薇坦認演出機會買少見少，主動搵大樹遮蔭，最近宣佈加盟英皇娛樂，未來繼續拍戲之餘，愛分享的她自覺最啱做真人騷，所以作出呼籲。目前為配合公司要求努力增磅，可惜緊張性格加體質，令她「食極唔肥」，呢四隻字應該激嬲唔少中女。採訪：杜杜攝影：錢文坤髮型:Debby Kwan@iHair 化妝:Henry Li 服裝:@aliceandolivia_hongkong、@ecco 場地:Greenhouse Times Square by Gaia Group

伍姑娘認為愛分享性格，很適合參與真人騷演出。

自2021年約滿邵氏後，伍姑娘再簽英皇，「不論內地或香港巿場都僧多粥少，演員多工作少，競爭大咗，唔可以單打獨鬥，我考慮咗好耐，係咪需要簽間公司？正所謂大樹好遮蔭。」閨密蔡一傑的意見令佢「叮一聲」，「佢話『老伍你仲係咁好狀態，做戲個樣仲得，又唱歌、主持咁多瓣，會唔會有間公司幫一幫會好啲？』我話『其實都諗過』。」

伍姑娘簽英皇後，感激老闆楊受成博士主動接見。

伍姑娘形容傑仔是生命中不能缺少的人，多謝對方百忙中亦關心她。

拍戲好開心冇入錯行

因為蔡一傑一句，「英皇都幾啱你，試吓之嘛又唔使死」，伍姑娘就主動搵英皇傾，「同英皇傾咗兩三次，好慶幸佢哋仲覺得我有商業價值，有好多可能性，我諗睇中我呢個年齡層嘅女演員唔係咁多，觀眾見我少咗，對上一次已經係《金宵大廈2》，都覺得我演技大進步。」老公和家人亦支持她的決定，「屋企人唔反對，最緊要我做得開心，而老練最開心見我每次演戲返嚟，係咁講演咗啲咩，演多次畀佢睇，證明我好enjoy工作。」講笑話自己已94歲，一把年紀的她好快樂，「有啲人返屋企會呻，我冇乜嘢呻，證明我冇乜仇家，過程愉快工作開心，我係帶住份開心返屋企，證明冇入錯行。」

伍姑娘視老公練海棠為最好朋友，簽公司當然跟對方商量。

伍姑娘跟兩個哥哥感情好，會互相支持。

愛分享私事啱真人騷

之前冇工開伍姑娘不斷增值自己，儲埋不少「彈藥」，「我睇好多戲、好多書，鍾意搭公車，會好無聊坐喺度睇好多人點郁點走。」她認為近年盛行的真人騷好啱佢做，「我真人啲嘢都好open，好容易分享畀你哋聽，冇包袱肯講自己嘢，我好鍾意做專訪同記者傾偈，好似好耐冇見嘅朋友會雞啄唔斷。」

伍姑娘睇完黃綺琳送的書及電影《填詞撚》，研究埋填詞。

伍姑娘早前跟公司同事齊出席導演會春茗。

2022年，伍姑娘快減9磅演《金宵2》操控狂阿媽「芬姐」。

拍完《金宵2》肥唔返

簽約後，英皇唯一要求伍姑娘增磅，原來2022年為《金宵2》演操控狂阿媽「芬姐」，快減9磅後肥唔返。5尺5寸高的她，多年來一直維持103至106磅，「個個都驚我生cancer死，睇醫生係happy problem嚟，根本係食極都唔吸收，檢查過真係冇事。」她認為體質外，自我要求高容易有壓力，亦是唔長肉主因，她試過在內地拍古裝時做測試，「睇住自己上磅，收工可以冇咗2kg（約4磅），我就係體態咁完美嘅女人，真係吹我唔脹，我係易精神緊張，畀咁大壓力自己嘅人，通常都唔肥得去邊，唔長肉。」中醫建議她食白飯增磅，一樣唔成功，「食咗飯大半年都係咁嘅磅數，心態同狀態好緊要，我係強迫症嗰啲人嚟，咁瘦都係冇原因，但唔擔心。」她發現長肉最有效方法是旅行，2月生日去了日本即見效，「最好個個月去一次，我係咪應該轉行做導遊？！」