區瑞強怕影響形象拒做選秀節目評判 欣賞吳大強唱歌有味道再邀做嘉賓丨獨家
2024-05-22 07:00 
68歲區瑞強（Albert）於本周五及六舉行慈善騷《區瑞強開心樂悠悠演唱會2024》，並邀請早在《中年好聲音》時已留意、73歲的吳大強（Bill）做嘉賓，但原來最初構思兩對父子檔同台演出，可惜吳偉豪忙拍劇未能抽空，另外，Albert又自揭拒做選秀節目評判的原因 。採訪：杜杜
Albert在《中年好聲音》時已留意大強演出，「呢個Bill哥哥唱英文歌好嘢喎！好有獨特風格同味道。」Albert雖然入行多年，但自問並非做《中年》這類選秀節目評判的材料，「我係畀唔到分，覺得好同唔好係好整體，唔可以拆散，好似一個女仔五官樣樣都靚，但夾埋未必靚，可能拆開五官未必係靚女嘅，加埋又好有味道，歌曲同歌聲都一樣，藝術就係咁，同埋我講嘢叻先死，批評到你體無完膚又唔想，形象唔好嘛！」
大強跟偶像同台似發夢
Albert和大強本在去年《歡樂滿東華》已有機會同台，可惜Albert「中招」，到去年聖誕節開騷，才邀大強正式合作，今次就安排大強負責唱英文歌部份。大強能再跟偶像同台好興奮，「佢一直係我偶像，睇佢嘅騷都唔知睇過幾多次，同台感覺好似發夢，以前離遠望到佢都成晚瞓唔着，唔係講笑，能夠同台真係好開心！」
Albert原先安排兩對父子檔演出，但可惜未夾到期，「上次《東華》我唱唔到就搵咗我個仔Adrian（區昕進）幫手，佢同我個仔合作過，今次本嚟諗住我同佢個仔合作，兩對父子一齊同台，但佢囝囝拍劇太忙。」大強覺得跟Adrian合作未夠喉，「上次Adrian代父從軍，我哋唱A Cappella 好有火花，都想再合作，估唔到今次有機會。」Albert當晚還安排點唱環節，「上次開騷試過即場打電話點唱，今次變嗌上台點，應該幾好玩幾開心。」大強已有晒準備，「我已練定30幾首經典英文歌。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應