MIRROR世巡尾場丨12子唱《前傳》掀回憶殺 姜濤唔認爆喊：感冒啫 Anson Lo回應濃妝事件
2024-05-20 14:45 
一連四場《MIRROR FEEL THE PASSION CONCERT TOUR 2024•MACAU》昨晚（19日）在澳門銀河綜藝館舉行尾場，全場爆滿，由於亦是MIRROR世界巡唱最終站，所以12子的粉絲也帶同偶像燈牌到場支持，場面壯觀。演唱會於晚上7:10開始，全場粉絲即興奮狂叫 ，MIRROR出場後跳唱《Rocketstars》 、《SHEESH》 、 《Innerspace》 ，唱到第二首歌時，全場也在MIRROR呼籲下企起身。
可能因為最後一場，各成員表現興奮及毫不留力，但亦有蝦碌事發生，當Alton與AK 及Lokman跳唱《Rebound》，Alton在做完一字馬後起身竟然甩鞋，他即時尷尬地執回波鞋著上，而Lokman及AK亦忍不住邊跳邊笑，Stanley在獨唱送給已離世媽媽的《來不及》時再一次忍不住淚灑舞台，而他亦不禁擰頭及拍心口，之後他雖強忍，但仍喊到唱不到，此時全場亦大合唱，為他唱餘下部份，而他亦送飛吻多謝大家，Anson Lo唱畢《My Life》後，講「I live my life for all of you！」冧粉絲。12子合唱完《人類群星閃耀時》後，他們先跟大家打招呼，隊長Lokman多謝大家這五年的支持，他代表12子承諾大家，以後會做更多好的作品，之後MIRROR再唱出《WE ALL ARE》 及 《One and All》 ，姜濤亦忍不住喊。
在每晚最期待的彩蛋環節中，Lokman表示這份禮物很特別，因為專誠揀整個巡迴最後一晚送給大家：「5年前，MORROR未出道之前，呢首歌將我哋介紹俾大家，我想話我哋嘅初心一直都冇變到，我哋好珍惜每一次嘅演出。」之後他們便唱出《全民造星》主題曲《前傳》，唱完後他們笑指這是「回憶殺」，更搞笑地笑指想起Stanley除衫，最後，MIRROR在唱完《Catch A Vibe》 後便為今次巡迴演唱會畫上圓滿句號。完場後粉絲不肯離場，不停大叫Encore。
MIRROR完騷後受訪，Lokman指其實巡迴到新加坡站已開始捨不得，在澳門場就是倒數，所以覺得感觸：「演唱會橫跨咗好長時間，到而家真係落幕，都期待下一次係幾時。」他們笑言下次最遲是10周年的時候，完成演唱會後，Alton指最想按摩，其他人則指是「食嘢」，提到Stanley在社交網站中表示腰痛，他指是因操得太勁所致，不過他指跳《前傳》時最後擺的甫士只是企不穩：「我跳跳吓好肚餓，（腰對男人嚟講好緊要？）所以要努力再操好啲。」至於Alton跳甩鞋，他笑言希望大家睇得開心：「我第一次咁樣甩，都係第一次咁冇經驗去補救，不過好似大家都覺得OK，驚險得嚟都幾得意，好彩對襪冇穿隆。」Lokman坦言覺得今場大家也出盡力，因為知道是最後一場，而看到粉絲回應令他們越來越落力，Edan表示之前還會留力，但尾場就博盡，而Lokman與姜濤最難忘的就是在後台聽到粉絲大叫，因為真的很大聲，完全能夠感受大家的熱情，姜濤又表示自己的感冒已好返，不過提到他在演唱會時喊，他就死口唔認說：「感冒啫，（感冒會流淚？）我打乞嗤！」至於他先下手為強，搶Stanley 閘貼自己的在車上勁肥的黑圖，姜濤笑說：「將條線拉到咁高，佢就冇得貼，大家開心就得。」至於Jeremy跟Edan自爆有很多「大表波」沒著衫的相，Edan更笑言自己手機內的照片不能曝光。
Anson Lo回應「濃妝論」
另外，早前盧覓雪在電台節目中開名笑Anson Lo濃妝，令一向脾氣好的AL忍不住連環出帖，反擊，問AL心情是否因此受影響？他表示沒有，出帖只是希望鼓勵神徒（粉絲暱稱），因他知道他們也有為此事不開心：「我好鍾意化妝，化妝係一件冇錯嘅事，都經歷咗幾年，呢幾年都收到一啲唔同嘅評論，我都好樂意同虛心去接收所有嘢然後再過濾。」他指最重要是互相尊重，至於被大讚素顏很可愛，問AL日後會否更多素顏？他表示自己經常會素顏出現：「巡演嗰陣我經常素顏落街，鬚都唔剃，係咪覺得我驚落妝？完全唔驚，even我哋前日做《12怪盜》Live，冇人有化妝，化唔化妝都冇乜所謂，總之自己feel good，睇場合化咩妝，冇害任何人咪得囉。」此時AK亦搭訕表示化妝是代表一種尊重，AL亦再補充說：「都係尊重，基本尊重好緊要，言行尊重。」即將開個人騷的Ian與AK被問到是否要開始着手籌備？兩人聽後即互相向對方索取門票，問他們是否欠下許多飛債，他們直認欠不少，至於會否考慮加場？Ian說：「唔到我哋考慮，公司考慮，但而家咁啱完咗Tour，就可以積極籌備，做好自己要做嘅嘢。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應