假如何伯買咗政府年金｜曾智華

全城講何伯！這位老人家已經七十幾，最近出現第二春，與一位48歲新移民閃婚，不惜與家人決裂。

整件事本來乃別人家事，唔關其他人事，只不過「劇情」有點不合邏輯，加上新何太出鏡時，手戴金勞鑽戒，更刻意突出名牌手袋及道出收咗30幾萬禮物，自然引起全港塘邊鶴懷疑，究竟是真愛或是騙局。

成年人應知 香港乃拜金社會

成年人應知，香港乃一拜金社會，加上有自由，故此各行各業凡涉及金錢的，皆以牟利為首要追求。於是直接製造出大量「合法」與非法的騙子，目標只有一個——「賺」或者「呃」你啲錢。

若你是個窮光蛋，咁就可以放心，因為搵鬼睬你，冇人會戇居居嘥時間。不過若你有幾十、幾百、以至幾千萬現金可調動，咁就會有無數人「瞓身幫你」。

合法的例如入到銀行，游說你買「金融產品」，總之你一落疊，就先斬你大筆佣金、行政費、手續費，之後就「關人個關」。你想中途套現？肯定再「重創」，失多一大筆。銀行職員睇到你戶口有幾多可以動用的現金，故各式「投資顧問」，一定不時「關心你」。

另外也有這樣那樣各行各業的「棍」及「蛇」，游說你夾錢（其實佢斗零都不用出）做「前景秀麗」的生意，最多的當然是開「財源滾滾」的餐廳，一開門就有現金入。

結果首先是「棍」及「蛇」在籌備餐廳期間，透過攞牌、裝修（樓面及廚房）、買搵食用具（最勁廚房設備）等，先斬你一大筆。正式開張後就又係「關人個關」，蝕死都唔關佢事。

別揸太多現金 防騙子防手痕

當然有流動現金幾百萬的寂寞長者，會更多人埋身「問候」，不但新聞小人物何伯是這一類，巴閉如「小甜甜」也曾如此。自由世界，你極難證實「愛你」及「關心你」者有行騙動機，因鬼叫你先已「動情」。

故此師傅教落，千祈咪揸住太多現金，一防騙子，二防自己手多多四圍「投資」，炒乜炒物蝕清光「棺材本」變過唔到世。政府早了解此危機，故為長者提供鎖死本金變長糧，再養足一世的年金。

假若何伯早早將老本鎖在年金，會有「何太」出現嗎？

資深傳媒人 曾智華

相關文章：

再婚遺產繼承糾紛多 子女擅轉走資產 繼母可提告追討 律師：成功即分一半 6大分配順序

開銀行聯名戶口三大注意 避免日後爭拗 「雙簽」一樣有壞處？

---

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

緊貼最新最快新聞資訊，請立即下載星島頭條App：https://bit.ly/3Q29Vow