193曾為節目嘉賓心動怕瀨嘢：要勒緊底褲仔 阿Dee爆笑求執導MV實錄最終超支30萬丨獨家
2024-05-10 07:00 
193（郭嘉駿）＠ERROR早前推出單曲《B出口》，內容講述愛情觀，對於拍足124集的《晚吹-戀講嘢》，193坦言曾經對嘉賓有Feel，但礙於身份冇進一步行動，為怕瀨嘢，更要「勒緊個褲頭，勒緊個底褲仔。」講到隊友Dee哥求做MV導演過程，193演繹非常傳神，更大爆對方最終拍《B出口》MV超支30萬，最後甚至游說193一人一半清埋條尾數。採訪：杜杜 攝影：Stanley 形象:Lok Fong、Stephanie Choy 髮型:Harris Lai 化妝:Cori Wong 服裝:I.T.、JMDH、HOAX 場地:Seaview Viva
193早在製作《以為只是沒送花》時，已跟監製舒文傾《B出口》主題，他解釋歌名意思是愛情不止一種選擇，「好多時兩個人要遷就對方，為對方改變自己，但改變咗嗰個唔係佢？！其實會唔會有B出口？唔適合就放手，搵個唔需要遷就，都可以好開心細水長流嘅人。」
最憎女友想改變自己
歌曲非193的親身經歷，但也算「經驗」之談，「畢竟小弟係愛情長壽節目主持（《晚吹—戀講嘢》），呢個係我主持咗咁多集，或者做咗咁耐人嘅愛情觀。」問到曾否要求女友為自己改變？他即搞笑話：「梗係有啦！哈哈！喂呀，唔好喺我面前撩鼻屎。」另外，他最討厭女方試圖改變他，「要我去邊、食飯影張相睇吓，我都冇叫你咁做，做咩你要叫我咁做？想改變我生活方式，唔好同咁多女仔玩喎，朋友唔係男仔就女仔。」主持了超過100集《戀講嘢》，193獲益良多，「學識最多就係唔好偷睇對方手機，呢個真係死穴，9成會鬧交，每個人都有秘密，點解要偷睇啫，唔想畀你知嘅嘢咪唔好知，搵到個中間點去相處囉！」
冇時間拍拖唔想鬧交
193自爆主持《戀講嘢》時曾對嘉賓動心，「百幾集總有啲係鍾意嘅類型，或者性格好適合我，覺得好心動，但係勒住啦！冇攞聯絡，佢哋喺ig tag我、follow我都要勒住啦！做藝人最緊要勒緊個褲頭，勒緊個底褲仔。」他認為做得公眾人物就要有所犧牲，「會小心咗去交友識女仔，畢竟世途都險惡，小弟都係半個知名人士，唔好亂嚟，唔係就會畀人擺上網。」但他強調，就算做偶像都必需要拍拖，「當然可以拍拖，人都要抒發情感，冇咗愛情世界會缺乏好多嘢，但我𠵱家用好多時間工作，又要應酬friend，如果有伴侶畀得幾多時間佢？！對人都未必公平啦！到時又鬧交，又偷睇電話，睇吓係咪真係咁忙。」
阿Dee零導演費倒貼做
對於邀請阿Dee任《B出口》MV導演，193指阿Dee早在2、3年前已放風想執導隊友MV，直到1年多前再提，「佢喺我哋臨放工前再提『你哋MV下次不如試吓我做導演』，我見兩個隊友冇拒絕，但扮聽唔到收工，當然我當時都扮聽唔到啦！但就歷歷在目佢個尷尬、無奈、好失望嘅樣，我就記錄在案先。」所以再出歌就決定搵阿Dee拍，「唔係自己錢，自己錢就心痛啫！大家一齊揮霍公司錢幾開心呀。」他讚阿Dee的執導功力較《ERROR大冒險》進步超多，「入行5年，最刻骨銘心回憶，冇得瞓覺，冇錢，拍幾分鐘網片，拍咗20幾個鐘，Over 10幾個鐘，Over到化妝師求唔好再mark佢，嗰陣佢未了解，有限嘅budget就要拍有限嘅嘢。」
193稱阿Dee做了Budget Plan，依然瘋狂超支，「我call兩個贊助，但Dee大導都話唔夠，個budget可以拍到10個《再次Puppy Love 》MV。」免導演費的阿Dee最終更倒貼，「好彩阿Dee係知名明星、KOL，可以幫手還贊助，佢自己call多兩個返嚟，有4個贊助囉！但兩個禮拜前阿Dee WhatsApp我，『3哥呀，差6萬蚊做CG後期，你有冇興趣一人夾一半呀？』我當然唔會覆佢有興趣定冇興趣，扮睇唔到，過幾日佢開始同我講其他嘢，唔知係咪佢畀，唔敢問，驚問咗就要畀。」他計落MV超支一倍，「本身我兩個贊助佢搲多兩個，仲差6萬蚊，嗰度幾10萬，比我預算over咗20幾30萬，拍到兩個以上《以為只是沒送花》MV。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應