港股超買嚴重 宜先作調整｜古天后

5月7日，部份時間有陽光，有幾陣驟雨，初時能見度較低，日間天氣炎熱。市場對聯儲局減息預期再度升溫，美國債息持續向下，美股隔晚反覆做好，道指升176點或0.46%；標指升52點或1.03%；納指升192點或1.19%。

美企業績公布期踏入尾聲，股神巴菲特旗下巴郡為本周較矚目嘅業績公布，巴郡首季經營溢利急升，巴郡B股股價升1%。上季遭巴郡減持的蘋果公司股價跌0.9%，股神解釋減持蘋果非看淡其前景，僅為稅務安排。至於被巴郡沽清持股的派拉蒙環球，據悉正檢視來自日本索尼(Sony)及私募基金Apollo提出嘅收購方案，派拉蒙股價升3.1%。

美股未反映大選風險

高盛策略員David Kostin認為，股市尚未反映美國11月大選風險，特別係一旦選情緊湊，不論最後邊個勝出都可能引發市場波動；不僅如此，美國當局起訴大型科企嘅相關風險亦被低估。其實美股持續大牛市，三年以嚟確實未見較大型調整，每次調整過去，其後再創新高，確有啲高處不勝寒。目前並唔係追貨嘅時間。

呢幾日美股回勇，係市場對減息預期再升溫，不過聯儲局都係睇住個通脹數字去決定息率走向，暫時減息條件未成熟，即使息口已見頂，但短期提減息言之尚早。預期目前美股仍然係高位震盪，亦未見有任何原因要作大幅調整，息率走向仍然係主導美股上落嘅重要指標。

恒指18300成初步支持

反映中概股嘅金龍指數則回吐0.13%。隔晚ADR及夜期則靠穩，今早黑期預示港股今日開市平穩。港股連升10個交易日，累升逾2300點或14%，恒指昨日收18578點，拋離250天牛熊分界線5%，確認指數成功於今年1月築底。

技術上恒指自去年12月份至今年4月，形成一個頭肩底形態，上周突破頸線17200點後連日以過千億元大成交向上，逐步向頭肩底量度升幅19600點水平進發。不過由於短線已極度超買，唔排除短線或出現回吐，目前250日線約17600至17700水平已成為首個重要支持，初步支持為上移至18300，即5日線附近及及周一低位18362點，不跌穿繼續向上尋頂。

至於整個升浪較大支持為頸線位17200點及心理關口17000。今日即市阻力為18700至18750，即市支持為18300至18400。

古天后

—

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

緊貼最新最快新聞資訊，請立即下載星島頭條App：https://bit.ly/3Q29Vow