林奕匡剖白準老竇矛盾心情：香港讀書真係好辛苦葉巧琳黃妍笑談有味減壓妙法丨獨家

2024-04-23 07:00

林奕匡（Phil）、葉巧琳（Mischa）及黃妍（Cath）首合唱新歌《藝術與科學》，因為要在日本大型音樂平台「The First Take」（TFT）初次演繹派台版本，兩女好緊張更自爆錄音前要另類減壓。另外，Phil開心分享準爸爸心情，強調拒做怪獸家長，唔會讓小朋友步自己後塵做書蟲，然後慘被兩女睇死，未來必定被仔女食住。採訪：杜杜攝影：羅安強形象:Sam [email protected]化妝:Carmen C(Phil&Cath) 髮型:[email protected](Phil)、Milk Chan@XENTER(Mischa) 、Aki Choi(Cath) 服裝:ithk(Phil)、Harvey Nichols HK(Mischa&Cath)

Phil、Cath及Mischa都覺得今次錄音，有種重拾做新人的感覺。

Cath、Phil及Mischa都覺得今次錄音，有種重拾做新人的感覺。

由於太緊張，Cath到達日本後一直失眠。

Mischa有做組合經驗，識得教Phil和Cath放鬆。

準爸爸Phil努力搵奶粉錢外，會盡量兼顧家庭。

Phil在「TFT 」演繹兩首歌，除《高山低谷》10周年版，還邀同門 Mischa及Cath一齊玩，將早已完成的歌改編成《藝術與科學》。因為「TFT 」演繹版本會派台，3人不容有失，加上得3星期準備相當大壓力，更透露上「TFT 」前兩日，已飛到日本準備。Mischa稱錄音前一晚，Phil練歌到半夜，「我喺酒店房會緊張，就出咗去食飯，零晨仲聽到Phil唱緊歌。」住隔籬房的Phil講完Sorry再解釋，因感冒未好怕影響水準，「有少少氣管敏感，嗰度得1、2度，一出門就會影響把聲，更加擔心。」

3人講起上「TFT 」過程，依然好興奮。

日前3人出席新歌《藝術與科學》首播會。

錄音前約埋廁所減壓

翌日Phil起身即跑步及開聲，「仲有少少鼻塞，個人好水腫，希望狀態好啲先去。」Phil和Cath要飽肚先錄到歌，去到現場即食飯，Mischa就只食了隻蛋。埋位前兩女先在廁所碰面，Cath自爆：「我平時唔會喺街上廁所，佢（Mischa）話『你放低啲嘢先啦』，最後忍唔到放低咗。」Mischa答得搞笑：「放低咗幾両黃金，哈哈！」兩女大談減壓妙法搞到Phil好尷尬，「喂呀！你哋真係吖！我都可能有，但唔會同人講呢啲嘢！」 Mischa認為好普通的事，「大家有做過舞台劇就會知，Good Show......s！」

3人完成「TFT 」錄音後，還到了富士山拍MV。

Cath錄音後趁機放假，去了奈良美智博物館。

Mischa為了保密行程，只post風景相。

聖誕快閃4日返加拿大

即將做爸爸的Phil好期待，但提到當日太太攞住驗孕棒報喜時，未敢太開心，「始終未穩定，要冷靜啲，先照顧太太身體，到照超聲波見到BB，同佢心跳，見到佢捽眼先至相信。」準爸爸得知喜訊，即計劃跟太太返加拿大跟家人過聖誕節，就算只得4日勁匆忙，「朋友都冇見過，但哥哥成家人都返咗去，10年冇試過一齊過聖誕，加埋喜事，所以好難得。」不過他當時未有向家人報喜，「我哋心裏知道，呢件係好難得嘅事，有個新成員，家庭大咗少少。」

2月尾，Phil公佈太太李靄璣（Rikko）陀BB好消息。

Phil已有10年沒有跟哥哥一齊歡度聖誕節。

去年聖誕節，Phil和老婆Rikko返加拿大與家人慶祝。

唔認同會被仔女食住

準爸爸Phil已有不少轉變，首先搬屋以便外母回港湊孫，以及請工人，「有人話有咗搬唔好，但𠵱家搬總比之後搬容易，我辛苦啲搬多啲嘢，太太要瞓就瞓。」另外，聽到兩女之父陳柏宇提醒報學校注意事項時嚇親，但有信心不會變怪獸家長，「陳伯話邊間學校要報讀，係有啲恐怖，我喺加拿大讀書好隨便，10歲前冇乜正經過，都係玩之嘛！香港讀書真係好認真好辛苦，小朋友真係要由朝讀到晚，爹哋媽咪亦要讀埋一份，搵個平衡會好啲。」他以自己作例子，不想仔女步其後塵，「我細個係好勤力，好專心嘅書蟲，接觸咗音樂後，好多嘢唔係喺學校學到，去到某個歲數先知自己想做音樂，代表咗我咁多年嚟，未夠了解自己，需要啲乜嘢。」他認為教育是，要讓小朋友接觸更多新事物，「幸好我試過音樂，又以音樂做事業，希望我個BB有時間及空間去了解自己。」而Mischa和Cath就睇死Phil，一定畀仔女蝦，Mischa笑說：「一定食住你！」Phil唔認同，「唔會，知老婆太心軟，我要做衰人多啲。」Cath拒絕相信，「講住先，出咗嚟先嘞！」