《少女鬥惡龍》被片名耽誤的勵志童話丨頭條戲場

2024-04-22 05:00

一直都想講，NETFLIX原創電影的中文戲名改得好差，動作片極差，愛情片非常差，見到《少女鬥惡龍》片名，你必定以為有名少女要同條惡龍鬥餐死，少女的確是少女，但條龍唔只唔惡，仲非常之笨，自己會噴火，但同時又會驚自己噴出嚟嘅火。知道闖入龍洞的女主角Elodie(Millie Bobby Brown飾)真正身份後退一步諗一諗，唔會強硬話，「個龍洞係我㗎嘛，我係咪有話事權?」會講道理，是一條有品的龍。(已上架) 劇照提供:NETFLIX 撰文:廖思慧

公主裝身預備出嫁，一心諗住做王妃享受榮華富貴。

兩人度蜜月前要去祭祖，Elodie慘成獻給火龍的活祭品。

《少女鬥惡龍》是美國奇幻冒險動作電影，某小國好窮，人民就快冇得食，公主Elodie獲父親安排嫁畀某強國的Prince Henry(Nick Robinson飾)，雖然盲婚啞嫁，但Elodie都好期待做王妃，因為王子富貴又靚仔，兩個一見鍾情，首見面已經諗將來，以為童話式浪漫愛情故事?有個惡毒的奶奶加上無能的老公，點會浪漫。

火龍最講道理
故事超級簡單，就是賣女祭龍的故事，因為強國國王滅龍後代，火龍絕子絕孫都願意同國王Deal，國王為求自保與火龍達成契約，祭獻自己三個女兒以換取王國的和平，此傳統代代相承至永遠。然後王子好慘，不斷同各地公主結婚，老婆逐個成為火龍的晚餐，唔好受，但佢完全唔敢反抗，廢到爆烈。

被拋下龍洞的Elodie周身傷，仲叫天不應。

中間係惡毒奶奶，瘋狂殺新抱，左邊係廢王子，右邊係更廢國王。

Elodie發現火龍蹤影，不斷逃亡避火燒。

Elodie大婚後即被掉落龍洞，由浪漫愛情片極速變龍洞逃生記，高智商兼擁特技人身手的女主角Elodie過完一關又一關，每關都有前王妃留低逃難貼士，當你被困覺得冇得走又給你一線生機，特效精彩，龍洞好大又好靚，有發光河又有發光生物，仲有水晶石牆，遊戲感好強幾好睇，公主繼母難得唔衰，女主角靠勇氣同大膽自救及復仇，屬全家都啱睇的勵志童話求生電影。