KC&Tsoul懶理被潑冷水：5年後倫敦開演舞會 ROVER自爆首創作笑料亨仔驚寫歌丨獨家

2024-04-20 07:00

《造星V》囝囝黃家灝（KC）、田曜誠（Tsoul）、卓金樂（Kim）、陳鎮亨（亨仔）、雷濠權（Jason Loi）及王希晉分別以期間限定跳舞組合KC&Tsoul及樂隊ROVER出道。K&T明知跳舞明星路難行，懶理被撥冷水，樂做開荒牛。而ROVER做親訪問都玩互窒，以為好感情，原來5子磨合較創作更花時間。採訪：杜杜攝影：朱偉彥造型:SK & Z 髮型:Mavis Mar、儀、Ryan Tsoi 化妝:KaHo Cheng、Choco Wu、Marble Yip、Iris Luk 服裝:Harvey Nichols、Kowloon City Boy、Dr Martens、Deopuz場地:@minicorner_party

KC&Tsoul明白跳舞明星路難行，但外國可以，香港有可能成功。

KC&Tsoul主持的跳舞節目，將到美洲和亞洲等地拍攝。

田曜誠（Tsoul）

黃家灝（KC）

KC&Tsoul在去年8月13日的《全民造星V Summer Live 2023》後傾簽約，Tsoul坦認對公司決定非常驚訝，「真係多謝公司，出band係make sense，但畀我哋兩個做跳舞組合喎！」KC讚公司勇氣可加，Tsoul認同：「夠膽死掉錢畀我哋，所以我哋會盡全力做好呢件事！」KC&Tsoul講明是期間限定跳舞組合，所以冇改組合名，KC坦言，「唔想永遠縛埋一齊，自由度可以好大，呢條路好多嘢需要試，唔想大家覺得我哋永遠係咁樣。」他又指不排除1年後繼續合作，「我哋想合作都可以再合體。」對於被質疑只跳不唱，他們解釋正是想開拓破格新方向，Tsoul說：「未來一定有機會聽到我哋唱歌，唔使擔心，我哋唔係驚咗唱歌而唔唱，如果我哋係咪都唱，同跳唱嘅人冇分別。」

KC及Tsoul錄音時撞聲，「連經理人同監製都分唔出我哋。」

《GET SILLY》MV，兩人分別在港九取景拍攝，夠貼地。

以MIRROR作例子自勉

外界唔睇好跳舞明星的發展，就連同樣跳舞人出身的肥仔（梁業）＠ERROR，接受本報訪問時亦認為路難行。KC認為要試過先知，亦感激一眾《造星》跳舞前輩幫他們鋪路，「公司覺得可以咁行，唔係我哋做得特別出色，係過往幾屆做到，開始多人認識跳舞，潛移默化，從來唔覺得我哋係終點，之後有人可以再捧住呢樣嘢繼續行落去。」Tsoul再用師兄MIRROR作例子，「如果你哋潑我冷水，唔做就冇㗎喇！之前都冇隊咁成熟嘅男團，5年後大家見到好成功，佢哋當初都俾人話好困難，唔緊要時間證明囉！5年前點會諗到佢哋有呢個高度，可以去倫敦開演唱會，講唔定5年後，我哋都去倫敦開演舞會，我哋會盡力做，唔知work唔work㗎！」公司已為他們定好今年兩大目標，除了跳舞節目，還有大騷，「節目內容會去外國搵跳舞明星拜師學藝，接住有個演舞會，請返節目中出現過嘅跳舞明星嚟表演，仲有香港dance group，做一個純跳舞嘅Performance畀香港人睇。」

KC&Tsoul出道記招只跳不唱《GET SILLY》，引起不少討論。

Tsoul日前搵來師兄肥仔拍《GET SILLY》跳舞片。

Jason後悔冇去沖繩

ROVER同樣在《Summer Live》後，獲公司通知組Band，Jason一直冇露面，連《沖繩任你點》亦冇份拍，他解釋要在澳門科技大學上堂，「一星期返3、4日，我哋學校有啲似中學，冇得揀上咩堂，出席率計得好嚴，《造星》嗰時停咗一排，只差一個學期就畢業，趁時間尚算鬆動，嗱嗱聲讀完唔使煩。」對於冇拍《沖繩》他好後悔，「睇返先知蝕咗，好多好嘢玩，又見咗啲好特別嘅人。」亨仔又嚟玩嘢：「你冇去我哋都好遺憾，好唔開心。」希晉同Kim亦配合，「好唔開心！點解要去讀書？！」

ROVER希望未來可試更多不同音樂類型。

ROVER 4仔訪問不時互窒，但亦會互幫補飛答問題。

卓金樂（Kim）

雷濠權（Jason Loi）

王希晉

陳鎮亨（亨仔）

卓金樂（Kim）

雷濠權（Jason Loi）

王希晉

陳鎮亨（亨仔）

初次一齊夾Band，ROVER承認花在磨合的時間，較創作《秒速8公里》更多，希晉更踢爆平時口多多的亨仔，創作初期好少講嘢，亨仔就解釋：「我未寫過歌，好驚寫melody大家會笑我，其實笑過，但係佢哋都好支持我，有咩攞咗出嚟先，可能好呢！」他們感激有監製Edward Chan帶着，希晉說：「分析我哋把聲應該點，Edward老師呢半年嚟好重要。」

《沖繩任你點》只有3位ROVER成員拍攝。

ROVER的出道作《秒速8公里》，由他們作曲。

唔知ROVER有咩成員

Kim和亨仔早前為《造星V》導師陳蕾演唱會做嘉賓，首踏紅館的兩人都話超難忘，亨仔說：「一生人唔知有冇機會上紅館做表演，真係好慶幸有今次機會，仲要係我哋兩個嘅生日。」Kim坦認首日演出好緊張，隨後漸入佳境。對於網民指他們加上Nathan （魏念恩）和Tiger Foo（符紀男）才是真正的ROVER，亨仔強調最初不知ROVER成員安排，「都係我打開門嗰吓，先知老闆叫咗邊啲人嚟組呢隊band。」