體育精靈｜台灣啦啦隊員 人氣勁搵真銀 林襄李多慧轉會身價更高
2024-03-31 18:30 
香港金牛籃球隊，最近搞咗個「金牛啦啦隊選拔賽」，已經誕生15位Bull Girls。香港球隊一向唔注重呢方面marketing，落後其他地方一大截，希望金牛Bull Girls做得起個勢，遲到好過冇到。
好似台灣，啦啦隊文化非常成熟，甚至國際知名，好多女仔視為夢幻職業，因為係轉戰娛樂圈最佳跳板。當中以職業棒球隊的啦啦隊最出色。樂天桃猿旗下「樂天女孩」（Rakuten Girls）更加吸粉無數，林襄、李多慧、珺珺、琳妲等，都擁有大量粉絲，連帶收入亦相當可觀。
上年年底，台灣有個「十大人氣中華職棒啦啦隊員」調查，第1名係眾望所歸嘅林襄，2至10名順序李多慧、珺珺、琳妲、陳伊、孟潔、巫以萱、陳怡叡 Yuri、籃籃、慈妹。佢哋知名度比好多藝人更高，每月都會有唔少商演機會，反而上綜藝節目，通告費通常好少，但就可以增加曝光率同知名度。
台灣10大人氣啦啦隊員
咁究竟呢批啦啦隊，收入有幾多呢？一位擁有豐富資歷嘅台灣啦啦隊經理人豆芽（林裕庭），近期喺一個網上節目爆料，現時一般啦啦隊員年薪，至少超過50萬台幣（約13萬港元）。
我哋睇落好似好少，但要知道，台灣年輕人起薪點非常低，呢個月薪對一般後生女唔算低，而且有機會出名，搏長線有搵錢。
當然，打入10大人氣榜嗰批，已經係紅人，大把job接，隨時1個月都唔止50萬台幣。同節目主節人亦話，幾次見到啦啦隊女孩揸嘅車，仲貴過球員座駕，你都咪話唔巴閉。
最近台灣啦啦隊界有大新聞，被外界視死對頭嘅林襄、李多慧，近期遭到挖角，先後離開樂天女孩，轉投味全龍。由於消息哄動，新聞炒得勁熱，兩女神轉會除提高喇喇隊員收入，地位進一步提升，財源亦自然滾呀滾、滾呀滾……
----
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應