復活節｜港人蜂擁北上飲食界料生意跌3成嘆香港「靜英英」：盛事只惠及個別地區

2024-03-29 15:13

復活節長假期展開，大批港人北上，各口岸迫爆，其中上水站外人頭湧湧，排隊入閘人龍長達百米，有市民直言香港消費太貴，北上消費「平靚正」。截至今日早上10時，入境處公布各口岸出入境人次約28.2萬；其中，出境人次接近24萬，入境人次則超過4.2萬。

香港餐飲聯業協會會會長黃家和向《星島頭條》表示，預料長假期本地食肆整體生意跌兩成，晚市更達三成，認為港人北上已成為生活常態，「不止飲飲食食，連買餸都北上」，認為政府及旅發局搞盛事，只惠及個別地區。

▼復活節長假期展開上水站人龍長達百米▼

上水站外人頭湧湧，人龍長達百米。吳艷玲攝

上水站外人頭湧湧，排到的士站外。吳艷玲攝

A出口的入閘機亦須排隊入閘。吳艷玲攝

月台上亦擠滿人北上的人潮。吳艷玲攝

旅發局推「禮貌運動」黃：你估餐廳唔想有禮貌？

黃家和指，出境香港數字比入境高太多，現時平均每日僅10多萬人入境，雖然香港加強與內地融合並非壞事，但消費力嚴重外流，認為當局要加大力度，吸引旅客來港。他指香港最近有很多盛事，如Art Basel、Art Central，但只惠及個別地區如會展、中環、尖沙咀，其他地區卻「靜英英」，批評旅發局活動未能令全港各區受惠。

他提到最近有連鎖茶餐廳結束多間分店，指新界北租金貴、欠缺人手，自然服務亦欠佳。對於旅發局動用1.35億元推廣「全新禮貌運動」及支持業界措施，黃家和連聲苦笑：「你估餐廳唔想有禮貌，使咩旅發局做？人本身就應該要有禮貌......人手充足自然會提升服務，講乜都假！」