林嘉欣拍戲23年自爆怪行：睇唔到自己啲戲 興奮同囡囡研究劇本有得著丨獨家
2024-03-23 07:00 
林嘉欣首度成為「香港國際電影節」大使，她以往曾是電影節常客，特別是初入行時要瘋狂睇戲惡補不足，但做了媽咪後me time激減，現在睇戲更會受兩個囡囡影響，所以近年多睇韓星作品。因為耳濡目染，14歲大女對電影都好有興趣，嘉欣收到新劇本更會同囡囡一齊討論角色，非常有營養的親子活動。另外，嘉欣有一個睇自己戲的奇怪習慣，相當特別。採訪：杜杜 攝影：譚志光 髮型:Kristy Cheng 化妝:Will Wong 服飾:Miumiu、nanushka netaporter、Bvlgari、Christian Louboutin 場地:Hyatt Regency Hong Kong Tsim Sha Tsui
嘉欣笑言因為要平等所以一口答應做大使，「10幾年都冇女演員做大使，有冇搞錯？！性別平等去咗邊呀？！哈哈！」跟陳果導演及張獻民教授出任「火島大獎 - 新秀電影競賽（華語）」評審，嘉欣認為3人是不同領域代表，而只需在8套作品中揀選，算很輕鬆，「我試過去東京做短片評審，睇咗40幾部，原來45分鐘都係短片，我發覺後，嘩！哈哈！但係好過癮嘅。」她做評審準則會由觀眾角度出發，「唔會喺度睇眼淚有冇喺兩個眼睛，唔會挑剔呢啲嘢，着眼點都係導演、演員嘅選擇。」
享受跑影展煲戲
嘉欣對做評審持開放及期待態度，但唯獨不能看自己作品，「作為評審同睇自己戲係好唔同，睇自己戲係睇唔落，好多干擾，我要隔好多年先可以睇返自己嘅戲，冇辦法喺首映睇，會諗返現場好多嘢。」她又很享受以往跑影展的日子，「攞個pass就可以睇，康城、威尼斯、柏林呢啲影展，唔一定喺電影院睇，唔夠地方播放，試過喺威尼斯好似馬戲團嘅帳篷入面睇，又試過喺船上面睇，每個人有隻艇仔，好大個銀幕好過癮。」以往她亦經常去「香港國際電影節」睇戲，但自從有了小朋友就減少了，「冇乜自己時間，我依家又多一瓣就係陶瓷，基本上呢4年真係好少睇電影，加上疫情，大家習慣睇唔同嘅串流平台，冇乜入場睇戲。」作為大使，她都希望想到方法，推動大家入戲院睇戲，「最鍾意入戲院可以有兩個鐘頭抽離現實，好專注冇其他干擾，電影院會唔會係被遺忘嘅場所呢？諗到呢樣會覺得好傷心。」
從來唔會睇鬼片
講到睇戲口味，嘉欣主要看心情，但偏好暗黑類型，「如果睇咗幾部都好陰沉，要睇返啲light啲。」她初入行時會規定自己每日睇戲，當做功課，「成日覺得試鏡獲得《男人四十》個角色，但我冇讀戲劇、表演、電影，冇喺嗰個氛圍下成長，咪逼自己1日要睇幾部戲，法國新浪潮、二戰後日本導演作品、好多美國獨立電影、歐洲戲又有，我嘅training除咗走好多地方嘅戲劇工作坊，就係睇好多經典電影。」但鬼片就咪搞，「我會拍但唔會睇，15歲開始一個人住，仲要睇埋嗰啲戲會好驚，風聲或者好大力閂門，我都會幻想係嗰樣嘢。」
幕後工作冇興趣
當媽媽後，嘉欣笑指近年睇戲口味也受兩個囡囡影響，「有時都會想引導佢哋一齊睇某部戲，幾好睇喎！但係dead air冇人睬我，哈哈！佢哋揀嘅，我就會喺側邊睇雜誌，佢哋就會叫我唔好揭雜誌，想同我分享。」而分別14歲的Kayla及11歲Sofie已由愛看動畫轉到另一類，「韓國嘢多，佢哋開始鍾意呢啲。」她又會跟愛睇劇本的Kayla討論，甚至接新角色也會跟囡囡一齊研究，「小朋友冇filter，嗰啲問題好直接，有時佢哋啲疑問覺得又幾好喎！我都會受佢哋影響，我每次接部戲都鍾意同佢哋討論，家姐好鍾意攞我啲劇本嚟睇。」
當演員多年，嘉欣終在2022年音樂劇場《塑像譜：窺看時間狹縫凝固的某一刻》，參與構思演出部份故事，但其實她對演員以外崗位興趣不大，「上次導演甄詠蓓搵我，我先嘗試，我唔會話主動去做呢樣嘢。」她更笑指其他崗位太難，未必能勝任，「導演要管太多嘢，哈哈！我連啲女都唔想管咁滯，我都唔想有人管我；編劇我又唔夠叻，我都係做返最擅長（演員），沉溺喺劇本嘅潛藏世界已經最舒服。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應