專欄｜阿仙奴對波圖真係精彩

要我總結歐聯16強嘅比賽，好多比賽都係扣人心弦，兩場需要加時互射12碼分勝負，證明歐洲列強嘅水平亦都越嚟越接近，而印象最深刻嘅一場就係阿仙奴對波圖。

阿仙奴繼續執行到領隊阿迪達嘅戰術，不停去圍攻波圖，相信大家都習以為常，但係點解阿仙奴晉級得咁辛苦？原因係波圖嘅森巴味，𠵱家嘅森巴足球都已經係混合咗歐陸色戰術嘅踢法，可以睇得出防守係好有紀律，但係每一球波攔截都係好硬淨，佢哋真係會俾個身去埋，華利拿及雲達爾拿斯文圖，不停去箝制阿仙奴嘅右路單打，拖慢返對方嘅組織，都係好成功。雲達爾同祖奧馬利奧攔截成功次數合共有7次，令到阿仙奴兩翼唔順。而後面比比亦都喺後邊包咗好多波，防守係堅固。

而好多時反擊方面，佢哋嘅推進係好多個人突破，好快好直接，係好有個人節奏，令到對方捉摸不定。尤其是法蘭斯高好願意去挑戰對手，今場波過咗3次人。可惜把握力都係欠奉。贏波嘅阿仙奴其實都係靠住耶穌仔改變咗戰局，佢嘅狀態係麻麻地，但係佢嘅竄擾性，令到防守一方係有捉佢唔住嘅感覺。

所以森巴咪味係非常之重要，有佢嘅用處，現代歐陸式漸漸取替森巴式，或者教練干斯卡奧已經搵到合二為一嘅方法，期待佢教其他球會嘅表現。 Willhappy

-----

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ