黎展峯獲軒公特別照顧：好似老竇嘅愛 《飛黃騰達》「Billy」公開追女失敗史丨獨家
2024-03-08 08:00 
在ViuTV劇《飛黃騰達》演「Billy」獲讚的黎展峯（Andy）前輩緣極好，早前推出以真實追女失敗經歷做主題的歌曲，先獲古巨基「賜名」《不眠來電》，又得到同門師兄張敬軒主動提出親自調教他，黎後輩開心到難以形容，務必趁機好好偷師。採訪：杜杜
Andy之前連出3首輕快歌，今次決定推出慢歌，監製徐浩提議將自身慘情經歷作題材，「大學時鍾意咗同樣體育系嘅女仔，我試過連續3日發夢都見到佢，成日等佢打電話畀我。」可惜追了3、4幾個月，失敗收場，「雖然我未正式表白，但都做得好明顯，成日陪住佢，又寫啲比較曖昧message畀佢，但佢都冇反應，仲話『你唔好嘥時間喺我身上嘞』，同埋『我哋冇機會發展』，咁我咪唯有放棄囉！」
搲水吹搲咗個歌名
新歌一直未搵到適合名字，Andy就問合作過《星戰》的古巨基意見，「古Sir本身問我哋最近有咩煩惱，我想搲水吹咪搵啲工作嘢問吓，問佢點先可以改到好嘅歌名，可以得到共鳴，兩日後佢話依家大家都收到好多不明來電，不如叫《不眠來電》啦！大家都覺得好正！」
前輩緣旺盛的Andy，亦獲同門師兄張敬軒主動提出將他轉到同一經理人旗下，「我戲劇堂老師係甄詠蓓 ，因為喺軒公嘅工作室上堂，2013年都上過堂嘅軒公有時嚟探班，有次上完堂佢話『你不如去我個倉』，可以分享多啲嘢畀你。」追問Andy自覺何德何能有此良機？他坦認：「每日都問自己呢個問題，可能我哋都係2月之星，加上我係好奇寶寶成日問問題，每次上完堂都會同佢講學咗啲咩。」因機會難得，Andy會不厭其煩，當面瘋狂多謝軒公提攜，「好似多咗個阿哥，但佢嘅愛更似老竇，我成日多謝佢，佢每次都好客氣咁同我講，『Andy你唔好咁講，我哋係同門師兄弟，都想分享多啲人生經歷。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應