尹光龍年願望想跟軒公林家謙合作歌齡54年慘被《隱形遊樂場》假音考起丨獨家

2024-03-05 07:00

在樂壇54年的尹光(光B)去年被網民以A.I技術惡搞製作「翻唱版」《一人之境》及《Dear My Friend,》後爆紅，光B憑實力今年長做長有，個唱由香港紅館延伸到澳門，本月會到佛山演出，洽談中的還有吉隆坡。深受後生仔歡迎的光B原來最想跟張敬軒及林家謙合作，更自爆唱唔掂軒公的《隱形遊樂場》。採訪：方騫平

環星娛樂老闆張國林率尹光、Joe Junior、魯振順、蝦頭、瑪姬、張子丰、何雁詩等「撈起」。

尹光派幸運利是畀「契細佬」Joe Junior。

日前環星娛樂老闆張國林率「環星一哥」尹光及Joe Junior、魯振順、蝦頭(楊詩敏)、瑪姬、張子丰、何雁詩齊齊「撈起」及開年，望龍年一切順順利利。尹光主動派利是畀「契細佬」Joe Jun，原來兩年前兩人在同一場合打賭，話邊個年紀大就做契哥，最後Joe Jun較光B細兩年，故做咗兩年「契細佬」。光B自爆仲有個契哥：「幾十年前同寶島歌王張帝(「急智歌王」)唱歌時結拜，𠵱家我哋間中都有聯絡，之前張國林有意邀請張大哥來港開騷，但大哥話佢經已白髮蒼蒼，近年好少唱歌。」

原來台灣歌王張帝係尹光契哥。

80歲繼續唱

今年8月尹光80大壽，他自言唔知可以唱得幾耐，趁有人氣唱得幾耐得幾耐：「最重要係聲線，只要夠瞓就冇影響。」他又強調好欣賞年輕一代歌手，特別喜歡聽張敬軒及林家謙的歌，更自爆被軒公嘅歌考起：「我一路想學唱佢嘅《隱形遊樂場》，但首歌好高音，唱到咁上下就被棘住，而且唔係後生仔唱唔到假音。相反佢喺演唱會上演繹我嘅《你阿媽大減價》就好叻，真係唱得好好。」尹光好想同到軒公及林家謙合作，大讚兩人真係唱得好。他又指，多年前張敬軒曾提出搵他及朱咪咪做個唱嘉賓，可惜最後不成事。