蘇振維欣賞Edan夠專業期待跟黃子華合作拍《盜月者》撞樣「專家Dickson」被關注丨獨家

2024-03-02 07:00

賀歲片《盜月者》票房直迫2500萬，除3個MIRROR成員加張繼聰和白只外，當中不少角色被關注，包括演「馬文舜」Edan（呂爵安）「郵局條針」的「童童」蘇振維（Ray），演藝畢業的他是舞台劇專業演員，戲中演繹自閉人士神似加上撞樣《100毛》「專家Dickson」被留意。採訪：杜杜

Ray本身青靚白淨，真人跟「童童」相差好遠。

「專家Dickson」確實同「童童」有9成似。

自2019年演藝畢業後，29歲Ray便加入「中英劇團」主力演舞台劇，《盜月者》是他第1部超過1組戲份的電影，「副導演嘅女朋友以前同我合作過，推薦我去試鏡。」他收到角色簡介後做足準備，知道「童童」有自閉症，就參考幾年前演過的特殊人士角色，「佢哋叫我樸素啲唔好整頭化妝，我仲帶咗啲小道具，掛咗個證件套喺頸，又插咗支原子筆，加埋小動作，不停咁撳筆。」

Ray跟演藝同學兼女友文愷霖，畢業後齊加入「中英劇團」。

Ray早前演出「中英劇團」舞台劇《窮艙守護隊》。

Ray試鏡時掛住證件套，同「童童」造型差不多。

同Edan對戲好爽

Ray因為做足功課，順利被袁劍偉導演選中做「童童」，電影上映後更被外界誤會是「專家Dickson」，他也覺得很好笑，「自己演嘅時候完全唔覺，但我平時會戴眼鏡，讀書時已成日俾人話我似佢，哈哈！」首度跟鏡仔合作，他大讚最多對手戲的Edan，「佢好專業又好熟流程，同佢對戲好爽。」當然「爵屎」應援福利亦令工作份外愉快，「下午茶食豬扒包同奶茶，已經超正，工作人員話試過食長腳蟹𠻹！」

Ray同 Edan合作好愉快，大讚對方夠專業。

Ray完全冇預計電影上映後，「童童」會受關注，「拍嘅時候冇預計有咁多人去討論，不過袁導真係好有心，講真佢冇必要出個post去介紹我，我又唔係隸屬佢公司，真係會多咗人留意我嘅演出，幾開心收到好多留言，有啲會話『因為你下次會入場睇舞台劇』，幾好喎！」入行近4年，Ray不介意演出平台只想做個好演員，最想跟偶像黃子華合作，「我第1次接觸舞台演出，就係睇佢嘅棟篤笑。」