劉佩玥突失聲被嚇壞決心變阿佘咁Fit 劉穎鏇望龍年挑戰飛機師角色丨獨家

劉佩玥（Moon）和劉穎鏇（Tiffany）在兔年過得相當不俗，前者首次在頒獎禮打入「最佳女主角」5強，同佘詩曼拗手瓜；後者4度提名「飛躍進步女藝員」終首度奪獎，爆喊感謝父母是最強後盾。展望龍年， Tiffany望繼續突破挑戰機師角色；34歲Moon自爆頒獎禮時突然失聲，嚇壞的她認為是身體響警號，今年決心要搞好身體，望似佘詩曼到48歲都一樣Fit。採訪：杜杜 攝影：朱偉彥 服裝:Suncoo HK(Tiffany) 場地:The Salted Pig (MegaBox)

Moon和Tiffany這對雙劉姊妹花，最想今年能孖住去日本及冰島拍旅遊節目。

Moon和Tiffany這對雙劉姊妹花，最想今年能孖住去日本及冰島拍旅遊節目。

兔年首奪「飛躍進步女藝員」獎，Tiffany當然滿意又好開心，「今年好幸運攞到呢個獎，經歷咗呢7年努力有呢個獎，原來真係好開心好感動。」連續4年獲提名才得獎，她承認原來感受比想像中更大，「冇諗過會咁感動，攞嗰刻真係咩情緒都出晒嚟，個獎係飛躍進步，代表性係觀眾認同我真係有進步，係自己最想做到嘅嘢，嗰刻好安慰。」

Tiffany這年希望有更多搵真銀機會。

Tiffany首奪「飛躍進步女藝員」獎，在台上爆喊。

正向心態面對負評

Tiffany坦認因知提父母時必變喊包，台上講感言時刻意安排最後才答謝他們，「父母永遠係最大後盾，無論你做咩都好，佢哋永遠係咁支持，加上呢個獎嘅代表性，好多感受即刻湧晒上嚟，到父母點樣支持我，呢刻先有咁嘅獎勵，真係好多嘢諗。」她回想當年選完港姐，毅然放棄讀大學回港發展，亦得到父母支持，「佢哋唔畀壓力我，呢樣嘢好幫到我，畀我嘗試，只要係做緊自己鍾意做嘅嘢。」Moon又大讚Tiffany工作態度認真，得獎實至名歸「佢嗰種勤力，同埋想做好1樣嘢嘅決心、熱誠，我係好欣賞。」Moon又認為大家心態好相似，不太擔心負面評價，「佢睇完會問我，呢啲嘢係咪可以好啲，真係想做好啲，而唔係純粹覺得有人鬧自己。」Moon欣賞Tiffany，從對方得獎時她喊到變豬頭可以證明，「原來見住一個自己嘅朋友，好欣賞拍檔攞獎係咁開心，（林）子善仲有隔離呢個，嗰種喜悅真係開心過自己攞。」

Tiffany為完成父母心願，早前終完成大學課程。

兔年Moon同樣好充實，最難得當然是「最佳女主角」打入最後5強，「對我嚟講好有意義，不論係觀眾定公司都一路好支持我，去到10年呢個位，依家要諗點樣喺更加短嘅時間裏面再做得好啲，唔可以停留喺一個level。」去年奪得「馬來西亞最喜愛TVB女主角」獎的她，又認為得獎有鞭策作用，「獎項係跟我一世，我唔可以比起嗰時嘅我退步，要諗點樣維持之餘，點樣可以做得好啲，嗰個壓力係有喺度，亦都要喺度，畀自己壓力推動去做。」

Moon自爆失聲兼身體報告不理想，龍年首要搞笑身體。

Moon開心首次打入「最佳女主角」5強。

Moon去年奪得「馬來西亞最喜愛TVB女主角」獎。

望孖住拍旅遊節目

展望龍年，Tiffany希望挑戰多些不同角色，早前在《飛常日誌》做過索空姐的她，希望有機會挑戰飛機師角色，「做機師幾得意，以前好鍾意睇《衝上雲霄》，好神奇，可以嗰機師位度，有咁多掣任我控制。」而做過真空姐的Moon，卻想做飛機維修員，「我好想去維修嗰啲地方，我以前做空姐冇機會落去。」Tiffany亦想財源廣進，「冇話想買咩，但真係想搵多啲錢，自己儲或者畀屋企人都好。」Moon就笑言會用吸引力法則，吸錢埋身，「我係好愛錢，錢會好愛我，我啲錢會源源不絕咁嚟，每日都會咁樣同自己講。」

Tiffany這年希望有更多搵真銀機會。

Tiffany在《飛常日誌》演完索空姐，想再挑戰飛機師角色。

踏入龍年，Moon最想身體健康，因兔年實在太多病，「小病又好大病又好，睇醫生出入醫院太多次，當然唔係每次都同大家講，知道要做啲嘢，希望會有成績畀大家睇，亦都要畀自己同爸爸媽媽見到，每次我病佢哋係最擔心，真係好不孝。」她更自爆頒獎禮時，經歷人生第1次失聲，認為是身體響起警號，「嗰日我係變咗另外一把聲，講唔到嘢，非常擔心，冇試過咁樣，會唔會之後就係咁樣嘅聲，講唔到台詞，唱唔到歌，做唔到嘢。」她睇完醫生都未見好轉，感到好無助，「試過針炙又試過食藥，都未開到，我喺網上查真係有人係會永久失聲㗎！雖然見我冇乜嘢，如果話畀你聽個報告內容某啲數字，係幾擔心，有啲數字都會嚇一嚇。」嚇餐死的她要決心搞好身體，更認為在幕前發展是必須，「見到（李）施嬅、阿佘（詩曼）同（胡）定欣，我會覺得唔得啦！係時候要keep自己身體健康，如果依家都仲唔去努力做呢樣嘢嘅話，點樣喺佢哋年紀時候，仲keep到咁靚，咁 fit，狀態咁好。」

Moon自爆失聲兼身體報告不理想，龍年首要搞笑身體。

原來頒獎禮當晚，Moon是帶病出席。

Moon在新劇《執法者們》將挑戰亦正亦邪角色。

這對雙劉好姊妹，又希望今年可以一齊拍旅遊節目，兩人更積極幫一眾監製諗好遠近的目的地。Tiffany興奮話：「我哋首先去個近嘅，跟住再去個遠嘅，近去日本滑雪，遠就你揀嘞！」Moon畀Tiffany揀去希臘、瑞士及冰島，Tiffany最後選了冰島，Moon又不介意到時派福利泳裝上陣，「如果我去返參加港姐個身形，我OK㗎！」

Moon祝願大家跟自己都身體健康！Tiffany希望大家都能心想事成！

Moon和Tiffany這對雙劉姊妹花，最想今年能孖住去日本及冰島拍旅遊節目。

Moon和Tiffany經常合作成好友，互相鼓勵和支持。

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

 

《星島頭條》新網站有更多精彩內容：http://www.stheadline.com/