顧定軒被誤會唔再演戲成年冇收入想自己話事自資幾十萬做音樂丨獨家

2024-02-21 08:00

前年進軍樂壇的顧定軒(Zeno)，今年會繼續自資出歌，新歌《羅曼蒂克》MV亦在情人節推出，Zeno坦言做獨立歌手，條路好難行，除出錢出力，仲要絞盡腦汁做音樂甚至創作文案，搞到佢經常頭痛要常啪止痛藥，所以新年願望最想身體健康，唔想冇錢之餘仲要身子弱！採訪：方騫平

屬狗的Zeno唔在意今年犯太歲。

顧定軒喺新正頭到黃大仙拜神祈福。

Zeno誠心祈求身體健康。

顧定軒於新正頭到黃大仙拜神祈福，希望新一年身體唔好咁瘦弱，可能畀自己壓力太大，去年開show前身體負荷唔到，導致腸胃炎肚屙兼失聲，搞到朋友們擔心多過enjoy個show。對於屬狗的他今年犯太歲，Zeno就唔多在意：「肖狗好似年年都犯太歲，其實係咪都要咁過生活㗎啦，相信努力做人樂觀啲，有好嘅心態自然會開心啲。」

去年Zeno做Show前身體不適。

花幾十萬做音樂好有誠意

Zeno今年仍然會自資做歌，仲會籌備出實體唱片及精品：「呢兩年出新歌、實體唱片及精品、做show，夾夾埋埋花咗幾十萬，可想而知我幾咁鍾意音樂呀，同睇得到我嘅誠意。因為自己公司做音樂自由度大，可以直接表達想講訊息，作品有血有肉聽到自己心聲，反而拍戲係工具，滿足感冇音樂咁大。」不過，做獨立歌手唔容易，Zeno只能在有限資源下盡做，「相反拍戲有錢收，最慘啲人誤會我埋頭苦幹做歌手之後唔再演戲，近期真係少咗好多拍戲機會令我好頭痛，記得第一年做歌時因為冇乜收入，試過做西餅搵外快，自己做廚出身，唔會有演員光環。」