亨仔Kim希晉Tsoul龍年多諗頭《造星V》5子寫創意揮春KC秒畫「福U」丨獨家

2024-02-17 07:00

今年是《造星V》囝囝黃家灝（KC）、陳鎮亨（亨仔）、王希晉、田曜誠（Tsoul）及卓金樂（Kim）入行的第1個農曆新年，5子發揮創意，用自己名加龍年Idea寫揮春向《星島頭條》讀者拜年！本月底以不同組合形式出歌的他們，最想龍年拍劇和綜藝節目長做長有。採訪：廖思慧、杜杜攝影：朱偉彥形象:Dom CHEUNG 髮型:Mavis Mar、Ryan Tsoi、Chorus Ko 化妝:Choco Wu、Marble Yip、Iris Luk、Gabby Lam服裝:Tommy Hilfiger 場地:Little Sparrow

希晉、KC、亨仔、Kim和Tsoul以自創揮春向《星島頭條》讀者拜年。

要5子在5分鐘內寫揮春，當中要有龍兼有自己個名，眾人非常專注。

KC：「幸福，簡單一個字，福字下面有個U，代表福to you，KC個名收埋喺條豬鼻龍度。」

希晉：「學業晉步！祝大家學業進步，我哋就事業都進步，我畫畫冇乜天份，條龍盡咗力。」

Tsoul：「我個姓田字入面有龍馬精神，象徵精神喺我個名度長存，但條龍畫衰咗！」

亨仔：「財運亨通！亨就係我個名，個通字有啲心思，撐艇有條龍，下面再畫多條龍。」

Kim：「新年快樂！樂字就係我個名最後個字，本身想畫晒條龍，但係唔夠時間，得隻爪。」

入行後的KC對未來既不安又期待，因他跟Tsoul以比較少見的跳舞藝人身份出道，「唔知方法係咪啱，或者得唔得。希望可以拍多啲自己編舞嘅作品，幫artist排舞又好，自己純表現嘅作品都好。」至於做節目，KC最想跟4位兄弟繼續去其他地方拍《任你點》系列，「可以探索吓啲新嘢，發掘平時去旅行未必會知嘅嘢。」提到去沖繩曬到面腫，他稱已睇中醫調理中，唔怕再曬。

KC（黃家灝）

KC好想《沖繩任你點》成為系列節目，去更多地方拍攝。

希晉Tsoul入行齊感不安

希晉簽約後同樣有不安感，因自覺好多不足，「要做成功藝人要再花好多心機，拍綜藝點樣講嘢，要繼續學習。」早前在《Chill Club》跟《造星V》導師陳蕾及busking老友MC（張天賦）同場，他稱好緊張，但聽到陳蕾讚他，「現場都幾穩喎」即安樂晒，「身為『蕾安多芬』唔可以丟架，已經成為出道歌手，要努力保持水準。」重遇MC，他感受好深，「估唔到由busking到依家，可以喺唔同舞台一齊表演，好開心，希望有日可以成為豹哥同MC一樣成功嘅歌手。」

王希晉

希晉開心在《Chill Club》重遇陳蕾和MC。

做藝人後的Tsoul亦覺得不安，因公司跟他也不清楚跳舞明星條路要點行，「香港真係冇呢樣嘢，冇範例。」講到新年願望，跟《造星V》時的目標一樣，「實踐到講嘅嘢，以跳舞為主，但係都唱到歌嘅全能artist。」他更想拍多些綜藝節目，特別是冇底線的真人騷，如《公司冇逼我跑馬拉松》，「透過唔同節目做啲嘢，可以啟發到人，令到觀眾有行動力。」原來他早在《公司》拍攝期間已受影響愛上跑步，現在經常由牛頭角屋企來回啟德跑足10K，「跑步真係好有用，嚟緊要跳住唱歌，有氣真係差好遠。」

Tsoul（田曜誠）

Tsoul想挑戰《公司冇逼我跑馬拉松》這類極限真人騷。

亨仔Kim想拍愛情校園劇

亨仔好感恩公司肯簽他，「唔係都幾迷茫，唔知去邊。」他最想多拍劇，「拍劇先可以入到屋，遲啲希望有自己solo歌，一步步啦！」講到劇種，他最恨拍校園青春劇，「類似《我的少女時代》王大陸個角色，哈哈！即外表粗獷，內裏斯文，溫柔。」原來5子已參與過幾次劇集和綜藝節目試鏡，他們覺得要忘記自我投入角色好難，但最難是忍笑，Tsoul狂呻：「你諗吓！對戲要對住佢喎！（指住亨仔）哈哈！係有難度！」再問試鏡成績?眾人偷笑，「係未有嘅」。

亨仔（陳鎮亨）

亨仔最想演《我的少女時代》的王大陸角色。

《造星V》20強止步的Kim，問到知否獲邀簽約原因，身旁的Tsoul及亨仔齊笑，他尷尬笑言應該跟彈到低音結他有關。唔怕被笑，好鍾意睇劇的他希望今年多創作歌曲，亦想拍愛情校園青春劇，「好似《想見你》嗰啲。」問到心水女主角，他不願答，還扯開話題表示可跟希晉拍BL劇，再追問才答，「揀專業演員帶住比較好。」，Tsoul幫他解圍，提議他揀韓星韓韶禧，他即認同，「正呀！就呢個啦！」問到入行後會否多左好多女Fans埋身，聽畢問題，有另一半的四子以希晉少答嘢為由，推畀單身的希晉回答，「真係冇喎，最多都係Fans DM我問幾時再見到我。」