何依婷龍年展望：今年勝舊年升呢人妻學習辦年貨

2024-02-16 21:15

何依婷（Regina）去年的事業上有重大突破，憑台慶劇《新聞女王》人氣急升，同時她亦進入人生另一階段，與圈外男友結婚。踏入龍年，她希望「今年勝舊年」。文：鄺芷瑩圖：鄧國良

踏入龍年前，成為「林太」的Regina，專誠去購買蘭花及賀年裝飾品準備布置家居，迎接農曆年來臨。Regina坦言去年好開心，有很多收獲，是豐收的一年，「收到劇本（《新聞女王》）同監製傾故仔時，佢話佘詩曼就係你師傅，我好驚喜又開心，無諗過可以同佢一齊合作。呢套劇拍攝時已經覺得很好，阿佘返嚟都知收視會好，部劇出街後唔止香港收視好，甚至乎內地的收視都唔錯，自己在內地社交媒體的粉絲留言唔係得廣東省，係有北京、上海、天津、黑龍江唔同地方的人睇廣東話劇集，真係無諗過去到咁遠。」 Regina認為去年最大得着是從佘詩曼身上學習，「在阿佘身上真係睇到做演員應該係點？好幸運遇到佢！我請教過佢喊戲點樣，都講過自己好擔心演喊戲好驚喊唔到，反而佢叫我唔好擔心喊唔出，就話有時人傷心唔一定要喊，最緊要投入情緒，要專注在自己身上。本身都鍾意睇她的戲，但同阿佘合作後，會當她是超級偶像，是自己目標，唔止事業上目標，佢人生同工作態度都好值得去學習，係一個特別隨性、知道自己想要乜又努力競爭的人。」

何依婷細心揀選合適的年花。

去年大豐收，Regina希望今年的成績更勝舊年。

Regina感謝老公在事業上的支持。

成為人妻，Regina今年已經學習了怎樣辦年貨。

老公全力支持

去年成為人妻的Regina笑言沒有太大改變，由於跟老公大學時已認識是很好的朋友，所以婚後也會一起去旅行、滑雪，對方在在事業上亦給予她很大自由度，「佢都會覺得唔應該為了婚姻而放棄自己事業，我亦都係一樣諗法，會繼續努力工作。《新聞女王》會有一些錫戲或床戲，雖然老公有少少介意，最後都好支持，因為劇本很好，亦好鼓勵我繼續去拍劇。」今年是Regina以「林太」身份辦年貨，她笑言要買揮春、全盒以及為家居物品棄舊換新，仍然學習當中，就算買錯老公都會叫她下年再買過，「工作關係，今年農曆年放得幾日，所以同老公講之後再去滑雪。」談到可有計劃生B，何依婷表示沒有特別計劃，覺得生小孩是天賜的禮物，所以會隨緣，現在會以工作為先，不會刻意強求。

對於新—年龍年展望，Regina坦言希望將去年所學的東西能夠學以致用，在演戲上亦挑戰到自己，將來的演藝作品有突破，今年會勝過去年的自己。