古天后日誌｜港股再跌穿10日線 反彈或告一段落

1月31日，大致多雲，能見度較低，早晚有一兩陣微雨，日間短暫時間有陽光。美股隔晚個別發展，道指再創新高38497點，收市升133點，亦創收市新高。不過以科技股為主嘅納指則高位受壓，收市跌118點；標指亦回吐，跌近3點。反映中概股表現嘅金龍中國指數更跌2.2%，港股噚日跌逾300點後，夜期跟ADR持續偏軟。

本周唔少重磅科技股公布業績，微軟收入及盈利雙雙擊敗預期，但有AI加持下嘅Azure雲服務，收入僅增長6%不似預期，週二晚股價先破頂呈陰燭走勢，盤後一度跌2%，其後跌幅收窄，但其他科技股盤後普遍向下。至今已公布業績嘅美企表現好壞差半，多半是績後回吐。此外，目前科企巨頭雄霸十大市值股份情況令市場策略師響起警號，認為類近當年科網泡沫，引發拋售風險增加的憂慮。

儲局周四凌晨公佈議息結果

美國聯儲局進入議息期，明早凌晨2點將有結果，如無意外息口不變，主要睇會後聲明加息措辭會否出現改變，另外更重要縮表政策會否改變等。美股暫時仍然高位整固，靜待議息結果。

內地股市再度轉弱，市場期待繼續有中央救市措施出台，可惜大招未見，換嚟恒大被勒令清盤，再加上有傳聞碧桂園（2007）債權人亦申請將其清盤，市場憂慮內房將爆清盤潮。上證噚日跌近2%，連續兩日顯著回落，技術性反彈可能告一段落，深圳科創板更破底，拖累恒科指急挫3.3%，再度下試3000點大關。

恒指雖仍守10日線（15613）上，但大市氣氛相對上周明顯轉差，成交又回落至不足千億元，似乎又回復之前陰乾格局，回試前低位。港股要持續反彈浪並回復升勢，必先重上5日線（15968）及20日線（15955）匯聚區，並盡快回補噚日下跌裂口16013點至15897點，即至少要重返15900至16000水平，不過此關已成即市阻力，即市支持為10日線15600及15500回調黃金比0.5%。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ