頭條戲場丨《真的狠愛你》快樂睇肉

2024-01-27 06:00

由《毒癮女孩》上位巨胸女星Sydney Sweeney及《壯志凌雲：獨行俠》型爆劊子手Glen Powell主演的浪漫性喜劇，睇預告已知全片重女，男角質素亦相當高，有樣有靚絕Body塞滿103分鐘，加上多鹹多趣全澳洲拍攝，笑位夠抵死，最重要男女主角Chemistry超勁，性張力澎湃，flirt到我都睇到唔好意思，難怪傳兩人戲外搭上咗。好耐冇睇過呢類「唔帶腦入場系」romcom，輕輕鬆鬆2粒鐘，瘋狂笑完散場超滿足。(上映中)撰文:廖思慧

兩人一見鍾情，一開始已經甜椰椰。

話咁快登堂入室，之後發生咩，唔使我講啦。

男女主角因誤會而分開，再見返就不斷互相攻擊。

Bea同家姐及未來「姐夫」，全部靚女。

仲玩《Titanic》?唔好乜都BAM咗先，當然冇咁簡單。

電影在北美開畫後票房越戰越勇，上映後一直穩據票房榜首，力壓多部熱門電影，日前全球票房更突破1億美元，是繼2016年《BJ 單身日記：生得啦BABY》後，成績最好的限制級喜劇，咁一定有續集嘞。

笑到好攰
因為一次借廁所事件，Ben(Glen Powell飾)對Bea(Sydney Sweeney飾)一見鍾情，又靚仔又好人女方即沉船，即晚已登堂入室，雙方都以為可以告別單身狗，世事就係咁，咁如意就冇戲做啦。一次朋友聚會，兩人相遇，一夜情人變仇人，火藥味極濃，仲要蔓延至女方姐姐的澳洲婚禮，兩個火球一碰即爆炸，預計到婚禮應該好大鑊，飲大兩杯仲得了嘅?為平息民怨，兩人決定假扮情侶希望令親友們安心，然後出事嘞，靚人靚景仲要全片差唔多冇乜點著衫，又攬又拖同房瞓仲要跌埋落海，期間發生大量錯摸兼笑料，引你笑密度大約幾分鐘一個小笑位，10分鐘一個大笑位，真心笑到有啲攰。

Bea及Ben玩到墮海，睇到好想再去澳洲。

同樹熊傾偈呢幕好好笑。

戲中女角個個都識發光，又靚又好身材，演Ben前度的澳洲版王丹妮Miranda(Nat Buchanan飾)幕幕「春光明媚」，比堅尼個上身Size同乳貼一樣咁大，長期唔帶Bra，衣服露肉度極高，睇嚟佢好憎著衫。另外隆重介紹，Miranda戲中嘅PT情人，老翻雷神Beau(Joe Davidson飾)，角色設定好廢但亦最好笑，基本上一開口就引到你笑，百發百中，但網上資料唔多，希望以後多啲機會見到佢啦。