亞洲盃直擊｜日本全攻陣死晒火 抵輸畀伊拉克 現場遙望黑面三笘薰
2024-01-19 22:35 
【吳家祺卡塔爾直擊】周五晚亞洲盃D組爆冷，擺出全攻陣的日本發揮失色，以1:2不敵伊拉克，爭取出線要睇最後一輪對印尼戰果。
今次係首度現場睇日本隊，對其國腳表現滿有期待，但結果頗為失望，完全沒有之前在熱身賽的精彩發揮。現場所見，日本球迷人數尚算不少，他們賽前亦很有信心，沒想過會落敗而回。計人數，伊拉克球迷更鼎盛，見到球隊上半場已領先兩球，更是瘋狂打氣，非常震撼。
日本隊近大半年在各項賽事無堅不摧，德國、土耳其均是腳下敗將，面對伊克拉當然被全面睇好。首仗以4:2反勝越南後，領隊森保一亦信心爆棚，擺出全攻陣，除淺野拓磨做單箭頭，仲有久保建英、伊東純也、南野拓實後上支援，但發揮並不理想。
日本對伊拉克多圖睇
日本開波5分鐘已失守，門將鈴木彩艷要負責任，將伊拉克左路傳中球擊回中路，被對手中鋒侯賽因艾門輕易頂入空門。伊拉克守得住之餘，反攻推進亦相當流暢，侯賽因艾門完半場前藉一次美妙配合，為伊拉克頂成2:0。
日本下半場全力施壓，但一直老鼠拉龜，因傷避戰的三笘薰，在場邊見球隊受困，自己又無能為力，既面黑，又肉緊。
直到補時3分鐘，遠藤航才以頭槌為日本追成較接近紀錄，最後仍以1:2落敗。伊拉克兩戰6分率先出戰，日本3分，踢少一場的越南、印尼零分。
___________
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應