獨家丨薛家燕被李丞責取笑：都唔夠買玩具恨再抱孫等攞2萬生育獎勵金

2024-01-15 07:00

薛家燕率領玄學家李丞責、主持陳懿德、徐文浩及許文軒快閃「廟街夜繽紛」，拍攝TVB賀年節目《2024風山水起》外景，唔少途人及遊客搶住跟家燕姐及丞丞師傅「集郵」，後者指家燕姐龍年驛馬星動，會Keep住受歡迎兼賺大錢；73歲家燕姐聽到好開心，但最恨再抱孫，更開到口：「做好市民責任，支持生育。」採訪：方騫平攝影：譚志光

家燕姐及丞丞師傅在廟街拍外景時大受歡迎。

薛家燕和女主持陳懿德街頭跳開心舞。

薛家燕率許文軒、玄學家李丞責、徐文浩、陳懿德快閃「廟街夜繽紛」拍TVB賀年節目。

當晚丞丞師傅在街頭等候家燕姐期間，大人、細路、遊客均上前求合照，大讚「師傅好靚仔」，甚至追問丞丞師傅有冇中獎六合彩冧把提供，師傅大笑說：「佢哋安慰我啫，我有幾靚仔有自知之名，老婆劉倩婷只係鍾意我有才華。」家燕姐現身後場面更為混亂，大隊前往訪問美食檔時寸步難行。

李丞責向美食檔攤派發揮春。

家燕姐沿途被圍。

家燕姐及許文軒為檔販打氣。

丞丞師傅有小朋友fans。

唔在乎同A君感情

有指家燕姐手持9個物業及商廈，坐擁兩億身家，李丞責笑住踢爆：「20年前就係，𠵱家點只呀？」笑騎騎的家燕姐即轉話題，自爆工作已排到年中，龍年會飛來飛去忙到癲：「多謝師傅提點，佢話我今年驛馬星動，但要注意身體唔好太勞動。」超忙家燕姐唔在乎同A君的感情，反而著緊會否再抱孫：「我梗係恨啦，只係唔好意思講，新抱仔Zoe寧願唔返工專心湊仔。」問到會否加碼送大單位物業獎勵新抱生育？她大笑說：「攞咗政府2萬蚊新生嬰兒獎勵金先。」丞丞師傅搞笑回應：「2萬蚊都唔夠買玩具啦。」家燕姐表示順其自然，等兒媳坐低商量，丞丞師傅指家燕姐蛇年及馬年再抱孫機會較高。家燕姐提到孫仔Julian甜入心：「佢好孝順，會拍片提我多飲水，𠱁得我好開心，坐車都會狂loop孫仔啲片。」